بۇگىن قازاقستان نۇرسۇلتان نازاربايەۆتىڭ قازاقستانعا پرەزيدەنت بولعانىنا 27 جىل تولدى دەپ حابارلايدى قامشى اقپاراتتىق اگەنتتىگى.
27 جىل بۇرىن (1990) قازاق كسر-ىنىڭ «قازاق كسر پرەزيدەنتى قىزمەتىن بەكىتۋ جانە كونستيتۋسياعا (نەگىزگى زاڭ) وزگەرتۋلەر مەن تولىقتىرۋلار ەنگىزۋ تۋرالى» زاڭى، قازاق كسر جوعارعى كەڭەسىنىڭ «قازاق كەڭەس سوسياليستىك رەسپۋبليكاسىنىڭ پرەزيدەنتى تۋرالى» جارلىعى قابىلداندى.
1990 جىلى 24 ساۋىردە جوعارعى كەڭەستە زاڭ قابىلداعاننان كەيىن، پرەزيدەنتتى سايلاۋدا جاسىرىن داۋىس بەرۋگە قاتىسقان 335 دەپۋتاتتىڭ 317ء-سى ن.ءا. نازاربايەۆتى قولداپ، 18ء-ى قارسى داۋىس بەردى. ءناتيجەسىندە ن.ءا. نازاربايەۆ قازاقستاننىڭ تۇڭعىش پرەزيدەنتى بولىپ سايلاندى. ن.ءا. نازاربايەۆتى بۇل جوعارعى لاۋازىمدىق قىزمەتكە قازاقستان كومپارتياسى ورتالىق كوميتەتىنىڭ 21-پلەنۋمى ءبىراۋىزدان ۇسىنعان بولاتىن.
1990 ج. 20 قاراشادا قابىلدانعان "قازاق كسر-ندا مەملەكەتتىك بيلىك پەن باسقارۋ قۇرىلىمدارىن جەتىلدىرۋ جانە قازاق كسر كونستيتۋسياسىنا وزگەرتۋلەر مەن تولىقتىرۋلار ەنگىزۋ تۋرالى" زاڭعا سايكەس قازاق كسر پرەزيدەنتى قازاق كسر جوعارى اتقارۋشى جانە وكىمشى بيلىك باسشىسى بولىپ تابىلدى.
1991 جىلى 10 جەلتوقساندا "قازاق كەڭەستىك سوسياليستىك رەسپۋبليكاسىنىڭ اتاۋىن وزگەرتۋ تۋرالى" قازاق كسر زاڭىمەن قازاق كسر قازاقستان رەسپۋبليكاسى بولىپ قايتا اتالدى. ق ر جوعارعى كەڭەسى "قازاقستان رەسپۋبليكاسى پرەزيدەنتىنىڭ قىزمەتكە كىرىسۋى تۋرالى" قاۋلى قابىلدادى، وعان سايكەس ن. ءا. نازاربايەۆ 1991 ج. 10 جەلتوقساننان باستاپ ق ر پرەزيدەنتى قىزمەتىنە كىرىستى دەپ ەسەپتەلدى.
1991 جىلى وتكەن پرەزيدەنت سايلاۋىنا كانديدات رەتىندە نۇرسۇلتان نازاربايەۆ تىركەلدى. سايلاۋ كەزىندە ول 98،8% داۋىس جينادى.
1991 جىلى 16 جەلتوقساندا ق ر پرەزيدەنتى ن. ءا. نازاربايەۆ "قازاقستان رەسپۋبليكاسىنىڭ مەملەكەتتىك تاۋەلسىزدىگى تۋرالى" ق ر كونستيتۋسيالىق زاڭىنا قول قويدى، زاڭ بويىنشا ق ر پرەزيدەنتىنىڭ مارتەبەسىنە جانە رەسپۋبليكانىڭ مەملەكەتتىك بيلىك ورگاندارىنىڭ بارلىق جۇيەسىنە ايتارلىقتاي وزگەرتۋلەر ەنگىزىلدى. وسى زاڭعا سايكەس قر-دا مەملەكەتتىك بيلىك ورگاندارى ونىڭ زاڭ شىعارۋشى، اتقارۋشى جانە سوت بولىپ بولىنۋلەرى قاعيداسىنان كەلىپ قۇرىلدى. رەسپۋبليكا حالقىنىڭ اتىنان سويلەۋ قۇقىعى ق ر جوعارعى كەڭەسى مەن ق ر پرەزيدەنتىنە بەرىلدى.
1993 جىلى 28 قاڭتاردا جوعارعى كەڭەس سەسسياسىندا قازاقستان رەسپۋبليكاسىنىڭ كونستيتۋسياسى قابىلداندى، وندا العاش رەت "پرەزيدەنت" جەكە تاراۋى بەرىلدى. كونستيتۋسيانىڭ 75 بابىنا سايكەس ق ر پرەزيدەنتى مەملەكەتتىڭ باسشىسى بولىپ تابىلدى جانە رەسپۋبليكانىڭ اتقارۋشى وكىمەت بيلىگىنىڭ ءبىرتۇتاس جۇيەسىن باسقاردى، سونداي-اق رەسپۋبليكا ازاماتتارىنىڭ قۇقىعى مەن بوستاندىقتارىنىڭ، كونستيتۋسياسى مەن زاڭدارىنىڭ ساقتالۋىنا كەپىل بولدى.
1995 جىلى 30 تامىزدا وتكەن بۇكىلحالىقتىق رەفەرەندۋمنىڭ ناتيجەسىندە قابىلدانعان جاڭا كونستيتۋسيا پرەزيدەنت مارتەبەسىنە كوپ وزگەرتۋلەر ەنگىزدى.
1995 جىلى 1 ناۋرىزدا قازاقستان حالىقتارىنىڭ اسسامبلەياسى (قازىرگى اتاۋى - قازاقستان حالقى اسسامبلەياسى) پرەزيدەنت نازاربايەۆتىڭ وكىلەتتىگىن 2000 جىلعا دەيىن ۇزارتۋ ءۇشىن رەفەرەندۋم وتكىزۋدى ۇسىندى. سول جىلى 29 ساۋىردە رەفەرەندۋم وتكىزۋ تۋرالى شەشىم قابىلداندى. رەفەرەندۋمعا قاتىسقانداردىڭ 95،5 پايىزى نازاربايەۆتىڭ وكىلەتتىگىن ۇزارتۋدى قولداعانى حابارلاندى.
21 جىل (1996) بۇرىن ءدال وسى كۇنى ەلباسى ن. نازاربايەۆقا ەلدەگى ەڭ جوعارعى لاۋازىم بەلگىلەرى - «التىن قىران» وردەنى، ومىراۋ بەلگىسى جانە پرەزيدەنت بايراعى تاپسىرىلدى.
1998 جىلى 7 قازاندا "قازاقستان رەسپۋبليكاسىنىڭ كونستيتۋسياسىنا وزگەرتۋلەر مەن تولىقتىرۋلار ەنگىزۋ تۋرالى" زاڭعا ساي پرەزيدەنتتىڭ جاڭا وكىلەتتىك مەرزىمى — 7 جىلعا بەلگىلەندى.
1999 جىلى 10 قاڭتاردا ق ر پرەزيدەنتىن سايلاۋى ءوتتى. نۇرسۇلتان نازاربايەۆ - 80 پايىز، قارسىلاسى سەرىكبولسىن ءابدىلدين - 15 پايىز داۋىس جينادى.
2005 جىلى 4 جەلتوقساندا ق ر پرەزيدەنتىن سايلاۋى ءوتتى. كەزەكتى مەرزىمگە پرەزيدەنت بولىپ ن. ءا. نازاربايەۆ سايلاندى. وعان سايلاۋشىلاردىڭ 91،15 پايىزى داۋىس بەردى. باستى قارسىلاسى جارماحان تۇياقبايعا سايلاۋشىلاردىڭ 6،61 پايىزى داۋىس بەرگەن.
2010 جىلى ماۋسىمدا قازاقستان رەسپۋبليكاسىنىڭ كەيبىر كونستيتۋسيالىق زاڭدارىنا تولىقتىرۋ ەنگىزىلىپ، «قازاقستان رەسپۋبليكاسى تۇڭعىش پرەزيدەنتىنىڭ – ەلباسى» مارتەبەسى بەكىتىلدى.
2010 جىلى 23 جەلتوقساندا وسكەمەندە 320 ادام قاتىسقان ارنايى جيىن ءوتىپ، نازاربايەۆتىڭ پرەزيدەنتتىك وكىلەتتىلىگىن 2020 جىلعا دەيىن ۇزارتۋ ءۇشىن رەفەرەندۋم وتكىزۋدى ۇسىندى. بۇل ۇسىنىستى قازاقستان حالقى اسسامبلەياسى، ءماجىلىس دەپۋتاتتارى قولدادى. ءبىراق نازاربايەۆتىڭ ءوزى رەفەرەندۋم وتكىزۋگە قول قويماي، پرەزيدەنت سايلاۋىن 3 ساۋىرگە بەلگىلەدى.
2011 جىلعى قازاقستان پرەزيدەنتىنىڭ سايلاۋىندا نۇرسۇلتان نازاربايەۆ سايلاۋشىلار داۋسىنىڭ 95%-دان استامىنا يە بولىپ، ايقىن جەڭىسكە جەتتى.
2015 جىلى 26 ساۋىردە وتكەن پرەزيدەنت سايلاۋىندا سايلاۋشىلاردىڭ 97،75 پايىزى تاعى نازاربايەۆتى قولداعانى حابارلاندى.
زاڭعا ساي، كەلەسى پرەزيدەنت سايلاۋى 2019 جىلى ءبىرىنشى جەلتوقساندا ءوتۋى ءتيىس.
ايتا كەتەتىن بولساق، پرەزيدەنتتىڭ تومەندەگىدەي لاۋازىمدىق مارتەبەلەرى بار.
قازاقستان رەسپۋبليكاسىنىڭ تۇڭعىش پرەزيدەنتى – ەلباسى (ۇلت كوشباسشىسى)
قازاقستان رەسپۋبليكاسى قارۋلى كۇشتەرىنىڭ باس قولباسشىسى
قازاقستان رەسپۋبليكاسى قاۋىپسىزدىك كەڭەسىنىڭ ءتوراعاسى
دۇنيەجۇزى قازاقتارى قاۋىمداستىعىنىڭ ءتوراعاسى
قازاقستان حالقى اسسامبلەياسىنىڭ ءتوراعاسى
«نۇر وتان» پارتياسىنىڭ ءتوراعاسى
قازاقستان رەسپۋبليكاسى پرەزيدەنتى جانىنداعى شەتەل ينۆەستورلارى كەڭەسىنىڭ ءتوراعاسى
قازاقستان رەسپۋبليكاسى پرەزيدەنتى جانىنداعى كاسىپكەرلەر كەڭەسىنىڭ ءتوراعاسى
قازاقستان رەسپۋبليكاسى ۇلتتىق قورىن باسقارۋ جونىندەگى كەڭەستىڭ ءتوراعاسى
قازاقستان رەسپۋبليكاسى پرەزيدەنتى جانىنداعى استانانىڭ ساۋلەت كەڭەسىنىڭ ءتوراعاسى
نازاربايەۆ ۋنيۆەرسيتەتى جوعارى قامقورلىق كەڭەسىنىڭ ءتوراعاسى.
ەسكە سالاتىن بولساق، كونستيتۋسيانىڭ 42 بابى، 5 تارماعىنا ساي، ءبىر ادام قاتارىنان ەكى رەتتەن ارتىق رەسپۋبليكا پرەزيدەنتى بولىپ سايلانا المايدى. بۇل شەكتەۋ قازاقستان رەسپۋبليكاسىنىڭ تۇڭعىش پرەزيدەنتىنە قولدانىلمايدى.