تالدىقورعاندا پوليسيا ساۋناعا قاراقشىلىق شابۋىل جاسادى دەگەن كۇدىكتىلەردى ۇستادى، دەپ حابارلايدى قامشى اقپاراتتىق اگەنتتىگى الماتى وبلىسى ىشكى ىستەر دەپارتامەنتىنىڭ باسپا ءسوز قىزمەتىنىڭ مالىمەتىنە سۇيەنىپ.
قىلمىس تۋرالى حابارلاما پوليسياعا 24 ءساۋىر كۇنى تۇنگى ساعات ون ەكىلەردەن كەيىن كەلىپ ءتۇستى. وندا ساۋناعا مەديسينالىق بەتپەردە كيىپ تاياقپەن قارۋلانىپ العان ءۇش بەيتانىس تۋرالى حابارلانعان. سەيفتەن اقشانى توناعان قىلمىسكەرلەر ساۋنادا اكىمشى بولىپ جۇمىس ىستەيتىن 68 جاسار ايەلدى ۇرىپ سوققان.
“جەدەل ىزدەستىرۋ شارالارى بارىسىندا تالدىقورعان ءىىب قىزمەتكەرلەرى وبلىستىق ۇقكب جەدەل قىزمەتكەرلەرى قىلمىس جاسادى دەگەن كۇدىكپەن 25-32 جاس ارالىعىندا ءۇش ادامدى انىقتاپ، ۇستادى. ۇستالعاندار تەرگەۋ يزولياتورىنا وتىرعىزىلدى”، — دەپ حابارلادى پوليسيادا. «قاراقشىلىق» بويىنشا قىلمىستىق ءىس قوزعالىپ، تالدىقورعان ءىىب وندىرىسىنە الىندى.