"ءبىز ادامنىڭ باعاسىن ونى كومگەندە عانا، زيرات باسىندا عانا ايتاتىن ۇلتقا اينالدىق..." تالاسبەك اعا وسىلاي دەپ ەدى... كەشەدەن بەرى قازەقەڭ تالاسبەككە تالاسىپ-تارماسىپ باعا بەرىپ جاتىر. اۋ، قازاقتىڭ بالاسى، بۇعان دەيىن ىزدەسەڭ قايدا قالدىڭ؟ تالاس اعا بۇ ساۋالعا جاۋابىن تاس-تۇيىندەپ ايتىپ كەتكەن ەكەن: " قازاقتىڭ قالامگەرى تەر توگىپ جازادى، جازعانىن ءتۇرلى امالمەن گازەتكە باسادى، كىتاپ قىلىپ شىعارادى. سودان سوڭ الەۋمەتكە قارايدى. ال الەۋمەت... ءلام-ميم دەمەيدى." نەگە ءۇنسىز قالامىز؟ كۇللى قازاق بىرەگەي ينتەللەكتۋال تالاسبەگىن نەگە تانىمايدى؟ اياكوزدىڭ شەنەۋنىكتەرى تالاسبەكتىڭ تىرناعىنا تاتىمايتىن قايداعى ءبىر انشى-پانشىلەرىن اسپەتتەگەندى بىلگەندە، وسى وڭىردەن ماعاۋيننەن كەيىن شىققان عۇلاماسىنىڭ ارقاسىنا ءبىر شاپان جابۋدى ءبىلدى مە؟ تالاسبەك تۋرالى دەرەكتى فيلم بار ما؟ زامانا اعىمى، ادەبيەتتىڭ دامۋى تۋرالى ايتقان پاراسات-پايىمدارى تاسپادا ساقتالىپ قالدى ما؟ "تالتۇسىنەن" بولەك دۇنيەلەرى كىتاپ بولىپ جارىق كوردى مە؟

تاعى دا جاۋاپتى تالاسبەكشە تارقاتساق: "د.كورچينسكيي ءوزىنىڭ «ريەۆوليۋسيا «وت كۋتيۋر» اتتى كىتابىندا، قانداي دا بولماسىن حالىق رەسپۋبليكاعا اينالۋ ءۇشىن ەڭ اۋەلى پۋبليكا كەزەڭىنەن ءوتۋ كەرەك دەيدى. ياعني، حالىق اۋەلى پۋبليكا بولىپ قالىپتاسۋى كەرەك، ءاربىر مادەني قۇبىلىس، ءاربىر جاڭا قوعامدىق وي، يدەيانى بۇكىل حالىق بولىپ جابىلا تالقىلاپ ۇيرەنۋى كەرەك دەگەن ءسوز. اعىلشىن سومەرسەت موەم ءبىر ماقالاسىندا فرانسۋز جازۋشىلارىنىڭ بىر-بىرىنە تەلەفون ارقىلى روماندارىن وقيتىنىن، وقىعاندارىن ساعاتتاپ تالقىلاپ، تالدايتىنىن ايتادى. باتىستا سولاي. سەبەبى، باتىستا پۋبليكا بار. ال بىزدە ولاي ەمەس. جانە ءبىراز ۋاقىتقا دەيىن ولاي بولمايتىن سياقتى." بۇگىنگى قازاق قوعامىنا تالاس اعا تاراپىنان بەرىلگەن اششى باعا وسى... مەنىڭشە، تالاس تۋدىرمايتىن پىكىر...

دينا تۇلەكوۆا. (Facebook-تەگى پاراقشاسىنان)