يراننىڭ استاناسى تەگەراندا وتكەن 35ء-شى حالىقارالىق فادجر كينوفەستيۆالىندە رەجيسسەر ءسابيت قۇرمانبەكوۆتىڭ «ورالمان» ءفيلمى شەتەلدىك فيلمدەر اراسىنان توپ جارىپ، باس جۇلدەنى - "ازيانىڭ ۇزدىك ءفيلمى" جۇلدەسىن جەڭىپ الدى دەپ حابارلايدى قامشى اقپاراتتىق اگەنتتىگى. قازاقستان رەسپۋبليكاسى مادەنيەت جانە سپورت مينيسترلىگىنىڭ تاپسىرىسى بويىنشا ش.ايمانوۆ اتىنداعى «قازاقفيلم» كينوستۋدياسى تۇسىرگەن اتالمىش فيلم وسى فەستيۆالدىڭ «شىعىس پانوراماسى» سەكسياسىندا 12 ەلدەن كەلىپ تۇسكەن 15 تولىقمەتراجدى كارتينامەن ب ا ق سىنادى.
ەستەرىڭىزگە سالا كەتسەك، «ورالمان» ءفيلمى تۋعان جەرىنەن كەتۋگە ءماجبۇر بولعان، الايدا ونداعان جىلدار وتكەن سوڭ اۋعانستاننان ەلىنە قايتا ورالعان قانداستارىمىز جايلى باياندايدى. فيلمگە دۋلىعا اقمولدا، ەسىم سەگىزبايەۆ، ەرجان ءتۇسىپوۆ، شىنار اسقاروۆا، بايان قاجنابييەۆا سىندى قازاقستاندىق تانىمال اكتەرلەر تۇسكەن.
- ءفيلمنىڭ ءتۇسىرۋ توبىن وسى العاشقى جەڭىسپەن قۇتتىقتايمىن، - دەدى كارتينانىڭ رەجيسسەرى ءسابيت قۇرمانبەكوۆ.
فادجر حالىقارالىق فەستيۆالىنىڭ نەگىزى 1982 جىلى يراننىڭ مادەنيەت مينيسترلىگى جانە يسلام باعىتى ۇيىمىمەن قالانعان. فەستيۆال قيىر شىعىستاعى ەڭ اۋقىمدى ءارى تانىمال جانە الەم كينەماتوگرافيستەرى مادەني بايلانىس ورناتا الاتىن بىردەن ءبىر الاڭ ەسەپتەلەدى.
ايتا كەتەتىن جايت، فادجر كينوفەستيۆالىنىڭ نەگىزگى بايقاۋىندا ءار جىلدارى «قازاقفيلم» كينوستۋدياسىنىڭ فيلمدەرى قاتىسقان بولاتىن، مىسالى: سەرىك اپرىموۆتىڭ «سوڭعى ايالداما»، ارداق ءامىرقۇلوۆتىڭ «قوش بول، گۇلسارى» (ارنايى جۇلدە، 2010 ج.)، دارەجان ومىربايەۆتىڭ «ستۋدەنت»، اقان ساتايەۆتىڭ «جاۋجۇرەك مىڭ بالا» (جۇلدە، 2013 ج.)، ەمير ءبايعازيننىڭ «اسلاننىڭ ساباقتارى» (ارنايى جۇلدە، 2014 ج.)، ەرمەك تۇرسىنوۆتىڭ «شال» (تەحنيكالىق جانە كوركەمدىك جاعىنان ۇزدىك كورىنىستەرى ءۇشىن ارنايى جۇلدە، 2014 ج.) فيلمدەرى قاتىسقان بولاتىن. وتكەن جىلى «فادجر» كينوفەستيۆالىندە ەرلان نۇرمۇحامبەتوۆتىڭ «جاڭعاق تال» ءفيلمى «ۇزدىك رەجيسسەر» جۇلدەسىن الدى.
فيلم جايلى: فيلم حح عاسىردىڭ 30-شى جىلدارى قىزىل اسكەردىڭ جەندەتتەرىنەن اۋعانستانعا قونىس اۋدارۋعا ءماجبۇر بولعان قازاق وتباسى تۋرالى. باس كەيىپكەر بازارباي قارتتىڭ ءبىر قىزى مەن ۇلى سول جاقتا دۇنيەگە كەلەدى. بالالارى ەسەيىپ، وتباسىن قۇرادى. ۇلى ساپارقۇل جەرگىلىكتى پۋشتۋن ۇلتىنان كەلىنشەك الادى. ال قىزى اۋعان جىگىتىنە تۇرمىسقا شىعادى. ساپارقۇل سوعىس كەزىندە مودجاحەتتەر جاعىندا سوعىسادى. جىلدار وتەدى. بازاربايدىڭ وتباسى قازاقستانعا كوشۋگە رۇقسات بەرەتىن كۆوتا الادى. بارلىعى جولعا جينالادى. تاۋلى قىشلاقتان شىققان وتباسىنى ۇزاق جول كۇتەدى.
