جاقىندا قازاقستاننىڭ قارۋلى كۇشتەرىندە اسكەري قىزمەتكەرلەردىڭ وتباسىمەن سۋيسيدتىك ارەكەتتەر مەن ءدىني ەكسترەميزمنىڭ الدىن-الۋ شارالارى وتكىزىلگەن. بۇل تۋرالى قازاقستاننىڭ قورعانىس ءمينيسترى ساكەن جاسۇزاقوۆ ق ر  ءماجىلىس پارلامەنتىندەگى ۇكىمەت ساعاتىندا حابارلاعان.  مينيستر ۇكىمەت ساعاتىندا اسكەري قىزمەتكەرلەردىڭ مەشىتكە بارۋىنا قاتىستى دا پىكىر ءبىلدىردى دەپ جازادى قامشى اقپاراتتىق اگەنتتىگى.

رەسەيلىك golosislama.com سايتىندا يكرامۋتدين حاننىڭ "مەچەت - زلو دليا مينيسترا وبورونى كازاحستانا؟"  (مەشىت قورعانىس ءمينيسترى ءۇشىن زۇلىمدىقتىڭ ورداسى ما؟) اتتى ماقالاسى جارىق كوردى. وندا قازاقستاننىڭ قورعانىس ءمينيسترى ساكەن جاسۇزاقوۆتىڭ اسكەري ادامداردىڭ مەشىتكە بارۋىنا قاتىستى ايتقان پىكىرىن سىنعا الدى. 

ايتا كەتەيىك، قازاقستاننىڭ قورعانىس ءمينيسترى ساكەن جاسۇزاقوۆ پارلامەنت ءماجىلىسىنىڭ دەپۋتاتتارىنا سولداتتار ارميادا مەشىتكە بارمايتىنىن ايتقان.

«ءبىزدىڭ ارامىزدا مەشىتكە باراتىن نەمەسە تاعى بىردەڭە ىستەيتىندەر جوق. سولداتتار ءبىر جىلعا ارمياعا شاقىرتىلادى. ءبىر جىلدا ول ۋاقىتىن كازارمادا وتكىزەدى جانە اسكەري ءبىلىم الادى. باسقاسىنا ۋاقىتى جوق» دەدى ساكەن جاسۇزاقوۆ.

"تاعى بىردەڭە ىستەيدى" دەگەندى قالاي تۇسىنۋگە بولادى؟ بالكىم مينيستر قىزمەتى كەزىندە بەس ۋاقىت ناماز وقۋدى مەڭزەگەن بولار؟ مەشىتكە بارۋعا وسىنداي كوزقاراستا بولسا، وعان تۇبەگەيلى تىيىم سالۋى دا مۇمكىن عوي.

نۇرسۇلتان نازاربايەۆتىڭ ۇزىن ساقال مەن قارا كيىمگە تىيىم سالۋ تۋرالى پىكىرىنەن كەيىن رەسپۋبليكادا پرەزيدەنتتىڭ اتاپ ايتقاندارعا عانا قاتىستى ەمەس (باسقا ءتۇستى حيدجاپتى كيۋگە بولادى، ال ساقالدى ءبىر قالىپقا كەلتىرۋگە بولادى)، بۇدان دا قاتال قادامدارعا بارۋى مۇمكىن. قورعانىس ءمينيسترىنىڭ اسكەري قىزمەتكەرلەردىڭ مەشىتكە بارۋىن دۇرىس ەمەس دەپ ەسەپتەيتىندىگى سوعان دالەل.

رەسەيلىك سايت رەسەيدە ءار اسكەري ءبولىمنىڭ جانىندا شىركەۋ بار ەكەنىن جازادى. سولداتتاردى كەيدە كۇشتەپ شىركەۋگە بارعىزادى ەكەن. شىركەۋ قىزمەتكەرلەرى اسكەريلەرگە «قاسيەتتى سۋىن» شاشادى. بۇل اسكەريدىڭ دىنگە دەگەن كوزقاراسى مەن قالاۋىنان تىس جۇرەدى.  

وسىعان بايلانىستى "گولوس يسلاما" قازاقستاندىق مينيسترگە "قاقتىعىز بولا قالسا، ءومىر مەن ولىمگە ءدىني كوزقاراسپەن قارايتىن اسكەر مە، الدە جاسۇزاقوۆ قۇرعىسى كەلەتىن اتەيستەر ارمياسى جەڭىسكە جەتە مە؟" دەپ سۇراق جولدايدى.