ساپالى جازىلعان زاڭدار ەلىمىزدىڭ تۇراقتى دامۋىنا جول اشادى، بۇل ماسەلە كاسىپكەرلەر ءۇشىن ماڭىزدى
«ەلباسى تاپسىرماسىمەن سالىق كودەكسىنە وزگەرتۋلەر ەنگىزۋ جايى تالقىلانىپ جاتىر. ق ر پرەمەر-مينيسترى ق ر ۇلتتىق ەكونوميكا مەن قارجى مينيسترلىكتەرىنە بۇل ماسەلەنى «اتامەكەنمەن» بىرلەسىپ شەشۋدى تاپسىردى. تالقىلاۋعا دەپۋتاتتاردىڭ بەلسەندى قاتىسقانىن قالايمىز. ەگەر دەپۋتاتتار تاراپىنان زاڭناما تۇرعىسىندا قانداي دا ءبىر ۇسىنىستار، ەسكەرتپەلەر مەن تولىقتىرۋلار ايتىلسا، ولاردى بىردەن ەسكەرۋىمىز كەرەك. وسىلايشا، زاڭداردى قاراستىرۋ كەزەڭىنەن-اق ولاردىڭ ساپاسى ارتادى. ال ساپالى جازىلعان زاڭدار ەلىمىزدىڭ تۇراقتى دامۋىنا جول اشادى، بۇل ماسەلە كاسىپكەرلەر ءۇشىن ماڭىزدى»، – دەپ، ويىن ءبىلدىردى «اتامەكەن» ۇلتتىق كاسىپكەرلەر پالاتاسى ءتورالقا ءتوراعاسى تيمۋر قۇلىبايەۆ.
«اتامەكەن» باسشىسى ينۆەستيسيالىق ۇدەرىستى دە ءسوز ەتتى. بۇل سالادا دا زاڭنامانىڭ ماڭىزى ايتىلدى. «سالىق»، «ەكولوگيالىق»، «كەدەن» كودەكستەرى قالاي جۇمىس ىستەيتىنىن تۇسىنبەي، ينۆەستيسيالىق ۇدەرىستى دە بولجاۋ قيىن»، – دەدى ءتورالقا ءتوراعاسى.
سونىمەن قاتار، تيمۋر قۇلىبايەۆ ق ر اكىمشىلىك قۇقىق بۇزۋشىلىق تۋرالى كودەكسىنە سوڭعى ءۇش جىلدا – 500 وزگەرتۋ، ق ر سالىق كودەكسىنە سوڭعى 9 جىلدا – 2500 وزگەرتۋ، ەكولوگيالىق كودەكسىنە 500 وزگەرتۋ ەنگىزىلگەنىن ايتتى.
«مىنە، وسىنداي زاڭدىق تۇراقسىزدىقتا ۇزاق مەرزىمدى ينۆەستيسيالاردى جوسپارلاۋ مۇمكىن ەمەس ەكەنى ايتپاسا دا تۇسىنىكتى. كەز كەلگەن ينۆەستيسيا كەلەشەككە باعدار جاساۋدان باستالادى: ەرتەڭ قانداي ەكونوميكالىق احۋال بولاتىنى ماڭىزدى. سوندىقتان، بۇل باعىتتا ۇكىمەتتىڭ جاقسى ەكونوميكالىق باعدارى كەرەك. ۇكىمەتتىك باعدار بىزگە بيۋدجەتتىك، تاريفتىك، سالىقتىق ساياساتتىڭ ۇزاقمەرزىمدى كورىنىسىن انىقتاۋ ءۇشىن كەرەك. وسى رەتتە ۇلتتىق بانك بىزگە نەسيەلىك-قارجىلىق ساياساتى بويىنشا باعدارىن بەرۋى شارت»، – دەدى «اتامەكەن» ۇكپ ءتورالقا ءتوراعاسى تيمۋر قۇلىبايەۆ.
