سەنات دەپۋتاتى سەرىك اقىلباي جول قوزعالىسىن رەتتەۋشىلەردىڭ قيمىلدارىن تۇسىنىكسىز دەپ تانىپ، ءىىم باسشىسى قالمۇحانبەت قاسىموۆقا جول پوليسەيلەرىنە تاياقتارىن قايتارۋ جونىندە ۇسىنىس ايتتى، دەپ حابارلايدى قامشى اقپاراتتىق اگەنتتىگى zakon.kz پورتالىنا سىلتەمە جاساپ.

مينيستر قازاقستاندىقتاردىڭ ءالى دە جول رەتتەۋشىلەردىڭ ىمدارىنا ۇيرەنە الماي جۇرگەندىگىن ايتتى.  

«مەنىڭ ويىمشا، ادامدار قولمەن جونگە سالىپ تۇرعان كوز شاعىلىستىراتىن كيىمدەگى پوليسەي قىزمەتكەرلەرىنە ءالى دە ۇيرەنىسىپ كەتەدى» دەپ جاۋاپ بەردى مينيستر قاسىموۆ.

ءوز ايتقانىنان قايتپاعان سەناتور سەرىك اقىلباي ءىىم باسشىسىنا كوز شاعىلىستىراتىن كيىمنىڭ ورنىنا قولدارىنا تاياق ۇستاتۋدى ۇسىندى.

«ونداي كيىمدەردىڭ باعاسى قىمبات شىعار. مەن ءوزىم كولىك جۇرگىزەمىن. كەيدە سول جول پوليسەيلەرىنىڭ قيمىلدارىن تۇسىنبەي قالامىن. مۇمكىن حالىق ۇيرەنگەنشە پوليسەيلەر تاياقتارىمەن جۇرە تۇرار. الەۋمەتتىك جەلىدە وسى ماسەلە بويىنشا حالىق شۋلاپ جاتىر» دەدى ول.

«بۇل ماسەلەنى قاراستىرامىز دەپ ويلايمىن. شەشىم ۇكىمەت قاۋلىسى بويىنشا قابىلدانعان. وتكەن جىلدىڭ 1 قاڭتارىندا تاياقتاردان باس تارتۋ جونىندە بۇيرىققا قول قويعانمىن» دەپ جاۋاپ قاتتى قالمۇحانبەت قاسىموۆ.  

ق ر ىشكى ىستەر ءمينيسترىنىڭ باسشىسى دا جول پوليسەيلەرىنىڭ تاياقتارىنا قاتىستى پىكىرىن ايتتى.

ق ر ءىىم پوليسەي اكىمشىلىگى كوميتەتىنىڭ ءتوراعاسى يگور لەپەحا دەپۋتاتتاردىڭ ۇسىنىسى قارالاتىنىن مالىمدەدى.

«تاياق ۇستاعان جول پوليسەيىنىڭ ءىس-قيمىلدارى اناعۇرلىم تۇسىنىكتى ەكەنىنە كەلىسەمىن. 2014 جىلى ۇكىمەت قاۋلىسىمەن بەكىتىلگەن بۇل ماسەلەنى قايتا كوتەرەمىز» دەدى ق ر ءىىم پوليسەي اكىمشىلىگى كوميتەتىنىڭ جەتەكشىسى سەنات ۇكىمەتى ساعاتىندا.

سونىمەن قوسا، جۇرگىزۋشىنى توقتاتۋ ءۇشىن تاياقتاردىڭ قاجەت ەمەس ەكەنىن دە ايتىپ قالدى.

«ەرەجەدە كورسەتىلگەندەي، جول پوليسەيى جۇرگىزۋشىنى تاياق نەمەسە قول قيمىلى ارقىلى، نە بولماسا ىسقىرىقپەن توقتاتۋ كەرەك. ءىس-قيمىل سول كۇيى قالادى، سەبەبى   ولار جول قوزعالىسى ەرەجەلەرىندە انىق كورسەتىلگەن» دەپ ناقتىلادى لەپەحا.

ونىڭ سوزدەرىنە قاراساق، تاياقتار قولدانىستان الىنبايدى، تەك ۋاقىتشا ساقتاۋعا جىبەرىلدى.

«بۇل ماسەلە بويىنشا ءبىز اسىقپايمىز» دەپ قوستادى ول.