وڭتۇستىك قازاقستان وبلىسىندا سەگىز جىلعا سوتتالعان ءاليما ۇسەنوۆانىڭ ارتىندا بەس بىردەي بالاسى قالدى. ءوزىن قورعاماق بولىپ، ىشىمدىك ىشكەن كۇيەۋىنە پىشاق سەرمەگەن كوپبالالى اناعا سوت وسىنداي قاتاڭ ۇكىم شىعارعان، دەپ حابارلايدى قامشى اقپاراتتىق اگەنتتىگى 31 تەلەارناسىنا سىلتەمە جاساپ.

الەۋمەتتىك جەلىلەردە جازاعا قاتىستى پىكىر بىلدىرۋشىلەر لەگى تولاستار ەمەس. اسىرەسە، ايەلگە جانى اشىعان پىكىرلەر جاعى باسىم.

وڭتۇستىك قازاقستان وبلىستىق قىلمىستىق ىستەر جونىندەگى اۋدانارالىق مامانداندىرىلعان سوتى كۇيەۋىنىڭ جۇرەك تۇسىنا پىشاق سۇعىپ ولتىرگەن 29 جاستاعى بەس بالانىڭ اناسىن 8 جىلعا باس بوستاندىعىنان ايىرۋعا ۇكىم شىعاردى. ماس ەرىنەن قورعانعان اناعا قاتىستى جازانى تىم اۋىر دەۋشىلەر الەۋمەتتىك جەلىدە پىكىرلەرىن جارىسا جازۋدا. كوپشىلىك ءىستىڭ قايتا قارالعانى ءجون دەپ ەسەپتەيدى.

«سوت ادىلدىكپەن شەشۋ كەرەك! بەس بالانىڭ وبالىنا قالماڭدار، شەشەسى بولماسا ولار كىمگە كەرەك! وسى جىندى سۋدىڭ كەسىرىنەن تالاي ەركەك نە ىستەپ نە قويعانىن بىلمەيدى، نازىك ايەل جاندى ۇرىپ-سوعىپ، قىز بالانى زورلاپ جاتادى! بوساتىلسىن اليما! بالالارىن تاربيەلەسىن!»،-دەپ جازعان جەلى قولدانۋشىسى.

«پەدوفيلدەر، ماشينامەن ادام ولتىرگەن بايلار، ميلليونداپ پارا العاندار بوساپ شىعادى دا، ءوزىن قورعاعان جازىقسىز ايەلگە 8 جىلدى قالاي ۇيالماي بەردى ەكەن؟»،-دەگەن پىكىردە قازاقستان ازاماتى.

«كولىكپەن ادام قاققان ۇسكەنوۆتى بوساتادى دا، ال ءوزىن-وزىن قورعاعان جاندى قامايدى. سوندا ەندى قورعانۋعا دا بولمايتىن بولدى گوي؟ شارتتى جازا بولسا دا بولاتىن ەدى»،- دەيدى  جەلى قولدانۋشىسى.

جاڭا جىلدىق كەشتە قوناقتاردى كۇتۋمەن بولعان ەرلى-زايىپتى اراسىندا، ءبارى تارقاعان ۋاقىتتا كيكىلجىڭ تۋىنداعان. وسى كەزدە بەس بالانىڭ اناسى ءاليما ۇسەنوۆاعا ماس بولعان ەرى كۇش كورسەتە باستاعان. سوزىنشە، سوققىدان قورعانىپ، قورلىققا شىداماعان ول كۇيەۋىنە پىشاق سىلتەگەن. ازامات وقيعا ورنىندا قايتىس بولىپ، بەس بالانىڭ اناسىنا ءتورت ايدان سوڭ قاتاڭ ۇكىل وقىلعان.

«جازانى تۇزەۋ كولونياسىنىڭ جالپى رەجيمدە وتەۋ بەلگىلەنسىن. جازانى وتەۋ مەرزىمى 2017 جىلدىڭ 1-قاڭتارىنان باستاپ ەسەپتەلسىن. وعان قاتىستى تاڭدالىپ الىنعان بۇلتارتپاۋ شاراسى بۇرىڭعىسىنشا كۇزەتپەن ۇستاۋ قالدىرىلسىن»،-دەيدى وقو قىلمىستىق ىستەر بويىنشا مامانداندىرىلعان اۋدانارالىق سوتىنىڭ سۋدياسى ساميدين تەمىرالييەۆ.

ال سوتتالعان ءاليمانىڭ بەس بالاسىنىڭ ءبىرى ءالى ەمىزۋلى نارەستە ەكەن. ال ۇلكەنى بولسا،نەبارى سەگزى جاستا.