پحەنياننىڭ بالليستيكالىق زىمىران سىناۋ ارەكەتى ساتسىزدىككە ۇشىرادى دەپ حابارلايدى قامشى اقپاراتتىق اگەنتتىگى.

اقش قورعانىس مينيسترلىگى اقپاراتىنا سۇيەنىپ ازاتتىقتىڭ جازۋىنشا، زىمىران اۋەگە كوتەرىلگەننەن كەيىن كوپ ۇزاماي سولتۇستىك كورەيا اسپانىندا جارىلىپ كەتكەن. الدىن الا مالىمەت بويىنشا، پحەنيان بۇل جولى ورتا قاشىقتىقتاعى بالليستيكالىق زىمىران سىناعىن وتكىزبەك بولعان.

سولتۇستىك كورەيا بيلىگى زىمىراندى سەنبى كۇنى، بۇۇ قاۋىپسىزدىك كەڭەسى وتىرىسى اياقتالعاننان كەيىن بىرنەشە ساعاتتان سوڭ ۇشىرعان. اسكەريلەردىڭ مالىمەتىنە سۇيەنسەك، سولتۇستىك كورەيا راكەتاسى جەرگىلىكتى ۋاقىتپەن تاڭعى 05:30-دا ۇشىرىلعان، ءبىراق ساراپشىلار رەكاتانىڭ بىرنەشە سەكۋندتان كەيىن-اق جارىلىپ كەتكەنىن بولجايدى. 

بۇۇ قاۋىپسىزدىك كەڭەسىندە سويلەگەن اقش مەملەكەتتىك حاتشىسى رەكس تيللەرسون ۇيىمعا مۇشە ەلدەردى پحەنيانعا قارسى سانكسيا رەجيمىن كۇشەيتىپ، بۇۇ قاۋىپسىزدىك كەڭەسىنىڭ وسىعان دەيىن قابىلدانعان قارارلارىن بۇلجىتپاي ورىنداۋعا شاقىرعان.

پحەنياننىڭ تاعى دا بالليستيكالىق زىمىران سىناعىن وتكىزۋ ارەكەتى تۋرالى Twitter الەۋمەتتىك جەلىسى ارقىلى بىلدىرگەن پىكىرىندە اقش پرەزيدەنتى دونالد ترامپ سولتۇستىك كورەيا بۇل قىلىعىمەن جۇڭگو مەن ونىڭ «اسا قۇرمەتتى پرەزيدەنتىنە» «دورەكىلىك تانىتىپ وتىر» دەپ ايىپتاعان.

ال، بۇگىن جۇڭگو سىرتقى ىستەر مينيسترلىگىنىڭ باسشىسى ۆان ي اقش-تا مەملەكەتتىك حاتشى رەكس تيللەرسونمەن كەزدەسكەن. ولار كورەي جارىم ارالى ماسەلەسىن بەيبىت جولمەن شەشۋگە توقايلاسقان. ەكى ەل وكىلدەرى ديالوگ ورناتۋ ارقىلى شيەلەنىستى توقتاتۋدىڭ بەيبىت جولدارىن قاراستىرىپ، بۇۇ رەزوليۋسياسىن جۇزەگە اسىرۋ جاعىن سويلەسكەن.