اقش مەملەكەتتىك حاتشىسى رەكس تيللەرسون مەن قازاقستاننىڭ سىرتقى ىستەر ءمينيسترى قايرات ءابدىراحمانوۆ نيۋ-يوركتە كەزدەسىپ، ارىپتەستىك ماسەلەلەرى مەن سيريا جانە اۋعانستانداعى جاعدايدى تالقىلادى. جۇزدەسۋدە كورەي تۇبەگىندەگى جانجال دا ءسوز بولدى.
حالىقارالىق ارەناداعى جاعداي قايرات ءابدىراحمانوۆتىڭ بۇۇ باس حاتشىسى انتونيۋ گۋتەرريشپەن كەزدەسۋىندە دە تالقىلاندى. قازاقستان وكىلدەرى 28 ساۋىردە بۇۇ قاۋىپسىزدىك كەڭەسىنىڭ مينيسترلەر دەباتىنا قاتىستى. اقش توراعالىعىمەن وتكەن دەباتتا سولتۇستىك كورەيا جونىندەگى ماسەلە تالقىلاندى.
حالىقارالىق قاۋىمداستىق كورەي تۇبەگىندەگى اسكەري جانجالدىڭ ورشۋىنەن قاۋىپتەنەدى. سوڭعى بىرنەشە اپتادا سولتۇستىك كورەيا يادرولىق ارسەنالىن كۇشەيتكەنىن كۇندە مالىمدەپ ءجۇر. پحەنيان جاپپاي قىرىپ جوياتىن قارۋدىڭ جاڭا سىناقتارى وتەتىنىن، ايماقتاعى امەريكالىق كۇشتەرگە سوققى جاسايتىنىن ايتتى.
اقش تەڭىز كۇشتەرى مەن اتوم سۇڭگۋىر قايىعىن كورەي تۇبەگىنىڭ جاعالاۋىنا جەتكىزدى. ۆاشينگتون جىل سوڭىنا دەيىن وڭتۇستىك كورەيادا زىمىرانعا قارسى قورعانىس جۇيەسىن ورناتۋدى كوزدەپ وتىر. اق ءۇي بۇۇ-نى سولتۇستىك كورەياعا قارسى سانكسيالاردى كۇشەيتۋگە شاقىردى.
پىكىر قالدىرۋ