ايەل-ينسپەكتوردى ۇرىپ سوققان ەر ادام حالىقتىڭ نارازىلىعىن تۋدىردى. رەسپۋبليكالىق كولەمدە دۇربەلەڭ تۋدىرعان بۇل قىلمىستىڭ جاي-جاپسارى بەلگىلى بولدى دەپ حابارلايدى قامشى اقپاراتتىق اگەنتتىگى.

ەستەرىڭىزگە سالا كەتەيىك، قۇجاتىڭدى كورسەت دەپ تالاپ ەتكەن ايەل-ينسپەكتوردى كيم ەسىمدى ازامات اياماي باسىنان، ىشىنەن سوققى جاساعان. مۇنىڭ ءبارى ۆيدەوعا تۇسكەن. قىلمىس مەكتەپ ماڭى الاڭىندا ورىن العان. مۇنىڭ ءبارى سول مەكتەپتىڭ دەنە شىنىقتىرۋ ءپانىنىڭ ءمۇعالىمى كورىپ تۇرعان. الايدا ەشكىم ايەل-ينسپەكتورعا كومەككە كەلمەگەن. ايەل-ينسپەكتوردىڭ بار جازىعى – ساباققا بارماي، اعاش كەسىپ تۇرعان بالانىڭ مەكتەپكە بارۋىن تالاپ ەتكەنى. «مەنىڭ بالام» دەپ وتىرىك ايتقان كيم ينسپەكتوردىڭ قۇجات كورسەتۋىن تالاپ ەتۋىن جاقتىرماي، وعان قارسى كۇش قولدانعان بولاتىن.

Patrul.kzء-تىڭ جازۋىنشا، جوعارىدا ەسىمى اتالعان ازامات بۇرىن-سوڭدى سوتتالعان ازامات ەكەن. ول ادام ولتىرگەنى ءۇشىن 2007 جىلى جازاعا ۇسىنىلىپتى.  پسيحولوگيالىق اۋىتقۋى بار ازامات ءۇش جىلىن الماتى وبلىسىنداعى اقساي ەلدى مەكەنىنىڭ پسيحياتريالىق  اۋرۋحاناسىندا ەمدەلىپتى. قازىرگى تاڭدا قىلمىسكەر ەكى ايعا ۇستالىنىپ، تەرگەۋ يزولياتورىندا وتىر. ەگەر دە سوت-مەديسينالىق ساراپتاماسىنىڭ ناتيجەسىندە قىلمىس جاساۋ بارىسىندا ەسى دۇرىس بولعانى دالەلدەنسە، ول  5-10 جىلعا دەيىن تەمىر تورعا قامالۋى مۇمكىن.  

حالىقتىڭ ىزاسىن كەلتىرگەن قىلمىسكەر ءوزىنىڭ ىس-ارەكەتىن قىلمىس دەپ ساناپ وتىرعان جوق. ەگەر مەنى بالا دا تىڭداماسا، بالانىڭ دا كوزىن كوگەرتۋگە دايىنمىن دەيدى ول.