«ساعان اسىقپىن» دەپ اتالاتىن باعدارلاما كحدر-دان قاشىپ شىققان كارىستەردىڭ وتكەن ومىرلەرىن، باستان وتكەن وقيعالارىن، كورگەن قيىندىقتارى مەن تارتقان ازاپتارى، وزەكتى ورتەگەن وكىنىشتەرى مەن قۋانىشتارى جايلى باياندايتىن رەاليتي-شوۋ دەپ حابارلايدى قامشى اقپاراتتىق اگەنتتىگى.

1990-شى جىلداردان باستاپ سولتۇستىك كورەيانىڭ 23000 تۇرعىنى وڭتۇستىككە قاشىپ كەلگەن ەكەن. «ساعان اسىقپىن» شوۋىنىڭ ماقساتى ەكى ەلدىڭ ءومىرىن سالىستىرۋ، كورەرمەنگە وي سالۋ. بۇگىندە كحدر-دىڭ 15 تۇرعىنى اتالمىش باعدارلامانىڭ كەيىپكەرىنە اينالىپ ۇلگەردى. شوۋعا تۇسكەن ءاربىر ازامات كورەيادا تانىمالدىلىققا يە.

دجۋ چانيانگ – سولتۇستىك كورەيانىڭ بۇرىنعى ازاماتى. ول ديكتاتورلىق تارتىپتە ءومىر سۇرەتىن ەلىنەن قاشىپ شىعۋ ءۇشىن تەمەكى مەن شۇلىقتى ساتۋعا ءماجبۇر بولعان.  ول 3000 كم. شاقىرىمدى «ۇستالىنىپ قالامىن» دەگەن قورقىنىش-ۇرەيمەن ءجۇرىپ وتكەن. بۇگىندە ول كوك جاشىكتىڭ جۇلدىزى. ونى كورۋ ءۇشىن مىڭداعان جانكۇيەر سەۋلدىڭ كوشەلەرىندە جينالىپ، كۇتىپ تۇرادى ەكەن. دجۋ چانيانگ ەسىمدى كەيىپكەر رەاليتي-شوۋعا 2012 جىلدان باستاپ قاتىسىپ كەلەدى. ول جۇزدەگەن ەپيزودقا ءتۇسىپ ۇلگەرگەن. ەلدەگى تانىمالدىلىعىنا قاراماستان، ول ءوزىنىڭ قاراپايىم قىز رەتىندە سەزىنەدى ەكەن. ءوزىنىڭ ايتۋىنشا، قاراپايىم ءبىراق تەليەۆيدەنيە ءۇشىن اسا كورىكتى ەمەس قىز.  «مەن ءوزىمدى كەرەمەت اكتريسامىن دەپ ويلامايمىن. وڭتۇستىك كورەيا جاستارى كحدر-داعى ومىرگە قىزىعا باستاعاندارىنا قۋانىشتىمىن. ۋاقىت وتە كەلە، ءبارىمىز ءبىر حالىق ەكەنىمىزدى تۇسىنەمىز دەگەن ۇمىتتەمىن» دەيدى دجۋ.

ارا كيم بولسا تەاتر كوللەدجىن ءبىتىرىپ، كيم چەن ىن ءۇشىن ونەر كورسەتەتىن قۇپيا مۋزىكالىق توپتىڭ مۇشەسى بولعان قىز.  

«ساعان اسىقپىن» شوۋىنىڭ سيۋجەتى بويىنشا كەيىپكەر قىزدار ءوز وتاندارىندا قالاي قينالعاندارىن، كحدر-دا ەكىنىڭ ءبىرى پلاستيكالىق وتا جاساعىسى كەلەتىندىكتەرىن، ەر ادامدار ايەل ادامدارمەن ەمىن-ەركىن سويلەسۋگە قۇلىقتى ەمەستىكتەرىن، قوعامداعى ءبىرتۇرلى تۇسىنىك پەن ەرەجەلەر جايىندا ايتىپ بەرۋلەرى ءتيىس.

سۋ رەيون ەسىمدى كەيىپكەر اناسى قايتىس بولعاندا تابىتقا اقشا تاپپاعاندىقتان اناسىنىڭ دەنەسىن كورپەگە وراپ جەر قوينىنا تاپسىرعاندىعىن ايتىپ بەردى.

«كيم ير سەن قايتىس بولعاندا ونىڭ ۇلى كەسەنە تۇرعىزۋ ءۇشىن ميلليونداعان دوللار جۇمسادى. ال بىزدە جاي تابىتقا اقشا بولعان جوق. مۇنىڭ ءبارى ادىلەتسىزدىك» دەيدى سۋ رەيون.

دايىنداعان: جازيرا بايدالى