استانا اۋەجايىندا باگاجدا جارىلعىش قۇرىلعى بار دەپ مالىمدەگەن اۋعانستان ديپلوماتى 3 ساعاتقا جۋىق قاماۋدا بولدى، دەپ حابارلايدى قامشى اقپاراتتىق اگەنتتىگى.
ءوز قىزمەتىن اتقارىپ، كابۋلعا قايتپاق بولعان اۋعانستاننىڭ بۇرىنعى ەلشىسى موحامماد فارۋك باراكي استانا اۋەجايىندا ۇستالدى، دەپ حابارلايدى اۋعان ارناسى 1TV.
اۋعانستان ۇلتتىق اسكەرىنىڭ بۇرىنعى باسشىسى قادام شاح ءشاحيمدى ەلشى ەتىپ تاعايىنداعان سوڭ ديپلومات قازاقستانداعى قىزمەتىن اياقتاعان بولاتىن.
موحامماد فارۋك باراكي ءوز ەلىنە قايتۋعا جينالىپ جاتقان، ءبىراق اۋەجايدا كەلەڭسىز جاعداي ورىن الادى. كەدەنشىلەردىڭ سۇراعىنا ديپلومات اشۋلى تۇردە بوما بار ەكەنىن مالىمدەگەن. بۇرىنعى ەلشىنىڭ ابايسىزدا شىققان مالىمدەمەسى جەدەل شارالار قولدانۋعا ءماجبۇر ەتتى.
اۋەجايعا كىرەر جولدار جابىلىپ، وقيعا ورنىنا جۇزدەن اسا ارنايى قىزمەتكەرلەر جىبەرىلدى. ديپلومات 3 ساعاتقا جۋىق قاماۋدا بولدى. قازاقستاننىڭ ءسىم قىزمەتكەرلەرى باراكيگە جاقتاسقاندىقتان جولىن جالعاستىرۋعا رۇقسات ەتكەن.
بولعان وقيعادان سوڭ بۇرىنعى ەلشى اۋەجاي قىزمەتكەرلەرىنىڭ اراسىندا تۋىنداعان تۇسىنبەستىكتى ايىپتاپ، باگاجىنا بايلانىستى ايتقانى قالجىڭ ەكەنىن مالىمدەدى.
