جەڭىل اتلەتيكادان قازاقستان ۇلتتىق قۇراماسىنىڭ جاڭا باپكەرى بولىپ گريگوريي ەگوروۆ تاعايىندالدى. بۇل تۋرالى ق ر جەڭىل اتلەتيكا فەدەراسياسىنا سىلتەمە جاساي وتىرىپ قامشى اقپاراتتىق اگەنتتىگى حابارلايدى.

گريگوريي ەگوروۆ 1988 جىلعى سەۋل وليمپياداسىندا سىرىقپەن سەكىرۋدەن قولا جۇلدەگەر اتانعان. شتۋگارتتا (1993 ج) وتكەن الەم چەمپيوناتىنىڭ جانە جابىق كەشەندەگى الەم چەمپيوناتىنىڭ (1989، 1993 جج)، ەۋروپا چەمپيوناتىنىڭ (1990 ج) كۇمىس جۇلدەگەرى. ازيا ويىندارىنىڭ جەڭىمپازى (2002 ج)، ازيا چەمپيونى (2003 ج). سىرىقپەن سەكىرۋدەن ازيا رەكوردسمەنى (5.90 م).

ق ر جاف جۇمىسىنىڭ باستى باعىتتارىنىڭ ءبىرى ەلىمىزدىڭ بارلىق وڭىرلەرىندە شىنىمەن دە قىزمەت اتقاراتىن وبلىستىق فەدەراسيالارى بار زاماناۋي سپورتتىق فەدەراسيا قۇرۋ بولىپ تابىلادى.

اتاپ ءوتۋ كەرەك، اعىمداعى جىلى سپورتشىلاردىڭ كۇنتىزبەسىندە مىناداي ءىرى جارىستار بار:

* جاسوسپىرىمدەر اراسىندا ازيا چەمپيوناتى (20-23 ناۋرىز، بانگكوك (تايلاند)؛

* XXVII عۇسمان قوسانوۆ اتىنداعى مەموريال (24-25 ماۋسىم، الماتى)؛

* ەرەسەكتەر اراسىندا ازيا چەمپيوناتى (6-9 شىلدە، بحۋبانەشۆار (ءۇندىستان)؛

* جاستار اراسىندا الەم چەمپيوناتى (12-16 شىلدە، نايروبي (كەنيا)؛

* ەرەسەكتەر اراسىندا الەم چەمپيوناتى (4-13 تامىز، لوندون)؛

* بۇكىلالەمدىك ۋنيۆەرسيادا (20-25 تامىز، تايبەي)

* جابىق عيماراتتاعى ازيا ويىندارى (17-27 قىركۇيەك، اشحاباد (تۇرىكمەنستان).