بەلارۋسيادا قولىڭىزعا اق قاعاز ۇستاپ شىقساڭىز نە بولادى؟
1 مامىر كۇنى قاعاز ۇستاپ شىققان 6 ادام تۇتقىندالدى دەپ حابارلايدى قامشى اقپاراتتىق اگەنتتىگى شەتەلدىك باق-قا سىلتەمە جاساپ.
جەرگىلىكتى تىلشىلەر وقيعا ورنىنا دەرەۋ بارىپ، ماسەلەنىڭ انىق-قانىعىن بىلۋگە تىرىسقانىمەن، پوليسيا قىزمەتكەرلەرىنىڭ ءبىرى دە اتالمىش جايتقا قاتىستى ايتۋدان باس تارتىپ، تىلشىلەردىڭ سۇراعىنا جاۋاپ بەرمەگەن.
اق قاعاز ۇستاعان ءبىر ازاماتتى قولىنان سۇيرەپ بارا جاتقان پوليسيا قىزمەتكەرىنە «ءسىز بۇل كىسىنى تۇتقىنداپ جاتىرسىز با؟» دەپ سۇراق قويعان بولاتىن. الايدا، پوليسيا قىزمەتكەرى: «جوق، ءبىز جاي عانا اڭگىمەلەسىپ بارا جاتىرمىز» دەپ جاۋاپ بەرگەن.
وقيعا ورنىندا قولدارىنا اق پاراق ۇستاعان تۇرعىنداردىڭ ءبىرى: «بۇل – ەركىندىك پەن بوستاندىقتىڭ بەلگىسى» دەپ مالىمدەدى.
«مەنىڭ بۇل جەرگە كەلگەن سەبەبىم: ەلىمىزدە تاعى دا ساياسي تۇتقىنعا الۋشىلىق باستالدى، مەن بۇعان قارسىمىن. ادامداردى جازىقسىزدان-جازىقسىز قولدارىنان جەتەكتەپ الىپ كەتىپ جاتىر، حالىققا ەركىن ءومىر سۇرۋگە مۇمكىندىك بەرسىن»، - دەيدى وقيعا ورنىندا اق پاراق ۇستاعان ايەلدەردىڭ ءبىرى.
