ءساۋىر ايىندا تەلەفوندارعا قوسىلعان جاڭا قۇرىلعى بار الەمدى جايلادى. جاستاردى بىلاي قويعاندا، ۇلكەن كىسىلەر قىزىعىنا باتقان بۇل قوسىمشا قۇرىلعى بارىنە ءمالىم – FaceApp باعدارلاماسى، دەپ جازادى قامشى اقپاراتتىق اگەنتتىگى.

العاش رەسەيلىك Wireless Lab كومپانياسى قۇراستىرعان بۇل باعدارلاما ەلىمىزگە دە جەتكەن. نە كەرەك، سمارتفونى بار كەز-كەلگەن ادام باعدارلامانى جارىسا جۇكتەپ، بەت-الپەتتەرىن نەشە-تۇرلى ادىس-تاسىلدەرمەن ارلەيتىن قوسىمشا قۇرىلعىلاردىڭ راحاتىنا بولەنىپ ءجۇر.

مۇنداعى قوسىمشالار مىناداي ەدى: ادامنىڭ بالا كەيپى، جىگىت بولعانداعى، نە قىز بولعانداعى كەيپى، قارتايعانداعى ءتۇرى، سونداي-اق ادامنىڭ كەلبەتىن ودان ءارى ارلەيتىن دە قۇرىلعى بار. ءيا، ادامنىڭ قىزىعۋشىلىعىن تۋدىراتىن بۇل قۇرىلعىلاردى ءبارى قولدانىپ كورگەنى انىق.

جىگىتتەرىمىز قىز بولساق، قانداي بولار ەدىك دەپ نەمەسە قىزدارىمىز كەرىسىنشە ىستەپ، ءوز كوڭىلدەرىن وزدەرى كوتەرىپ ءجۇر. الايدا، تالاي قىزىعىمەن ەلىرتكەن بۇل قۇرىلعىنىڭ ادامعا كەرى اسەرىن تيگىزەتىن تۇستارى دا جوق ەمەس. جوق، دەنساۋلىعىن ايتپايمىن. باستى ماسەلە ادامنىڭ نامىسىنا تيەر تۇستارى جايىندا بولماق. جوعارىدا ايتىپ وتكەندەي، ادام كەلبەتىن ودان سايىن ارلەيتىن Hot قۇرىلعىسى ناسىلدىك كەمسىتۋشىلىككە ايكەلىپ سوققان كورىنەدى.

«ياندەكستىڭ» بۇرىنعى قىزمەتكەرى، بۇگىنگى تاڭدا تانىمال FaceApp-تى قۇراستىرۋشى ياروسلاۆ گونچاروۆ Hot ءفيلترى ءۇشىن حالىقتان كەشىرىم سۇراپتى. نەگە دەيسىز عوي؟ نەگىزىنەن، باعدارلامانى قۇرۋشىلاردىڭ جوسپارى بويىنشا، Hot ءفيلترى ادامنىڭ كەلبەتىن ودان سايىن اسەمەدەۋ بولعان. الايدا بۇل قارا ناسىلدىلەر مەن ازياتتىقتاردىڭ كوڭىلىنە جاقپاي قالعان سىڭايلى. سەبەبى، بۇل قۇرىلعى قارا ءناسىلدى ادامداردىڭ تەرىسىنىڭ ءتۇسىن وزگەرتىپ جىبەرەدى ەكەن.

«FaceApp – ناشار قوسىمشا بولىپ قانا قويماي، ناسىلدىكتى كەمسىتۋدىڭ بەلگىسى. باعدارلاماداعى ءبىر فيلتر مەنىڭ تەرىمنىڭ ءتۇسىن اعارتىپ جىبەردى، ال مۇرنىم ەۋروپالىقتاردىڭ مۇرنى سەكىلدى بولىپ كەتتى. جوق، راحمەت، ەندى قولدانبايمىن» دەپ جازدى قارا ءناسىلدى ازامات الەۋمەتتىك جەلىدە.

گونچاروۆتىڭ ايتۋىنشا،  فيلتر جۇمىسىنداعى بۇل كەمشىلىك نەيروندىق جەلىنىڭ جاناما جۇمىسى. «مۇنداي ماسەلەنىڭ تۋىنداعانى ءۇشىن حالىقتان كەشىرىم سۇرايمىز» دەدى ول.

قۇراستىرۋشى، سونداي-اق Hot قۇرىلعىسىنىڭ Spark بولىپ وزگەرگەنىن دە ايتتى، ياعني ءپوزيتيۆتى كوڭىل-كۇي تۋدىراتىن ۇشقىن. «ءبىز كەمشىلىكتەردى قالپىنا كەلتىرۋ بويىنشا جۇمىستار اتقارىپ جاتىرمىز. بىرنەشە كۇندە ماسەلە شەشىلەدى» دەپ ۋادە ەتتى گونچاروۆ.

ايتا كەتەيىك، ناسىلدىك كەمسىتۋشىلىككە اكەلىپ سوققان باعدارلامالار ىشىندە FaceApp العاشقىسى ەمەس. مۇنداي جاعداي Micrososft باعدارلاماسىنا قاتىستى دا ورىن العان. 2016 جىلدىڭ ناۋرىزىندا كومپانيا قۇراستىرۋشىلارى دايىن ءسوز تىركەستەرىنەن قۇرالعان «اقىلدى تاۋ» حابارلاماسىن ىسكە قوستى.

سونداعى ءسوز تىركەستەرى مىناداي بولعان: «مەن كەرەمەت جانمىن! ءبارىن جەك كورەمىن!»، «مەن فەمينيستپىن»، «مەن ازياتتار مەن ەۆرەيلەردى جەك كورەمىن». سونىمەن قاتار، ساياساتقا قاتىستى تىركەستەر دە بولدى، گيتلەردى جاقتاۋشىلاردان باستاپ، ۇلتتىق قوزعالىستارعا قاتىستى تىركەستەر دە كەزدەسكەن.

مۇنى بايقاعان جۇرت ءۇنسىز قالمادى. ناتيجەسىندە Microsoft بوت-حابارلاماسىن ءوشىرىپ، نامىسقا تيەتىن سوزدەر ءۇشىن كەشىرىم سۇراعان.

دايىنداعان: گۇلىم جاقان