2017 جىلدىڭ 3 مامىرىندا قىرعىزستاندا بولعان قۋاتتى جەر سىلكىنىسى سالدارىنان 66 تۇرعىن ءۇي مەن الەۋمەتتىك ماڭىزى بار ءتورت نىسان قيراپ، اپات جاعدايىندا تۇر. تاعى 200-دەن اسا ءۇيدىڭ قابىرعالارى جارىلعان،-دەپ حابارلايدى قامشى اقپاراتتىق اگەنتتىگى قىرعىزستان رەسپۋبليكاسىنىڭ توتەنشە جاعدايلار مينيسترلىگىنە سىلتەمە جاساپ.

قۇتقارۋشىلار تاۋلى ايماقتاردا ورنالاسقان بەس اۋىلداعى جالپى ءۇش جۇزدەي ءۇيدى قاراپ شىققان. جەراستى دۇمپۋلەرىنىڭ ەپيسەنترى تاجىكستان اۋماعىندا بولعان. ونىڭ قۋاتى 7 بالل بولدى، ال قىرعىزستاندا 4-5 بالل دۇمپۋلەر سەزىلگەن.

 ەلدىڭ توتەنشە جاعدايلار مينيسترلىگى جانە جەرگىلىكتى بيلىك ورگاندارىنىڭ قىزمەتكەرلەرى قاتارىنان قۇرىلعان ارنايى كوميسسيا تۇرعىن ۇيلەر مەن الەۋمەتتىك نىسانداردى ارالاپ ءجۇر. تۇرعىنداردىڭ ءبىرازى ءقاۋىپسىز جەرگە كوشىرىلدى. ءقازىر وتەماقى تولەۋ ماسەلەسى قاراستىرىلىپ جاتىر. 

 "ءبىزدىڭ وكىلدەر مەن اكىمدىك قىزمەتكەرلەرى ءقازىر باسپانا قورىن زەرتتەپ، شىعىن كولەمىن انىقتاۋى كەرەك. جەرگىلىكتى بيلىك ورگاندارى جەر سىلكىنىسىنەن ۇيلەرى قيراعان وتباسىلارعا وتەماقى بەرۋ ماسەلەسىن شەشەدى. ال ءبىزدىڭ قىزمەتكەرلەر ادامداردى ءقاۋىپتى جەرلەردەن ماجبۇرلەپ كوشىرۋ تۋرالى ۇيعارىم شىعارادى. مۇنى بۇگىن-ەرتەڭ اياقتايمىز دەگەن ويدامىن"، - دەيدى قىرعىزستان ءتجم-نىڭ باسپا ءسوز حاتشىسى ەلميرا شەريپوۆا.

ازىرشە زارداپ شەككەن وتباسىلارعا ۋاقىتشا باسپانا رەتىندە پالاتكالار ورناتىلدى. جالپى بەس ورىندىق 100 پالاتكا ءبولىندى.