كەيۋانا وسىدان بىرنەشە اي بۇرىن ورتانشى ۇلى ماربۇلاننان اي سايىنعى 7 مىڭ تەڭگە اليمەنتتى ءوندىرىپ العان. ەندى اناسىنا قاراماي كەتكەن ۇلكەن ۇلى مارلەن دە شەشەسىنە اي سايىن ءدال وسىنداي سومادان بەرىپ تۇراتىن بولدى، دەپ جازادى قامشى اقپاراتتىق اگەنتتىگى.
كتك ءتىلشىسىنىڭ حابارلاۋىنشا، 73 جاستاعى كاميا اجەي تۇستەن كەيىن بولعان سوتقا بارا العان جوق. ايتۋىنشا، ۇلىنان تاياق جەپ، ونسىز دا دىمكاس دەنساۋلىعى السىرەپ قالعان. ۇلى، ءتىپتى، القىمىمنان الىپ، تۇنشىقتىرعان كورىنەدى. كاميا اجەي بولسا ءۇش كۇن تاماق ىشە الماي قالعان.
ۇلكەن ۇل سوتقا ارىز بەرگەنگە اشۋلانىپ، وسىلاي ىستەدى دەيدى قاريا. اناسى ءتىپتى پوليسياعا حابارلاسىپ، كوگەرگەن دەنەسىنە ساراپتاما جاساتقان.
«سونىمەن ماعان ايتادى، ارىزىڭدى كەرى قايتارىپ ال، بىزگە تيىسپە، دەيدى. سوسىن مەن اللاي، اللااي دەپ زورعا كەتتىم. ويلادىم، جىندانىپ كەتەم دەپ»، - دەپ جانايقايىمەن ءبولىستى كاميا مۇقاشيەۆا.
ال سوتقا كەلگەن ۇلى مارلەن، اناما قول تيگىزگەن جوقپىن، كەرىسىنشە، «شەشەم ماعان جالا جاۋىپ وتىر» دەپ بەزىلدەدى. ايتۋىنشا، ول ءدال سول كۇنى جۇمىستا بولعان. مۇنى ارىپتەستەرى ايعاقتاي الادى ەكەن.
«ول ءبىزدىڭ انامىز ەمەس. بالالارىنىڭ باسىن بىرىكتىرۋدىڭ ورنىنا ارامىزعا ىرىتكى سالادى. بالا كەزىمىزدە دە قيت ەتسە، ءبىزدى تاستاپ، توركىنىنە قاشىپ كەتەتىن. ءبىزدى اكەمىز ءوسىردى. انا دەيتىندەي ەش جىلىلىق كورمەي وستىك. ءتىلى سالا قۇلاش»، - دەپ جاۋاپ بەردى مارلەن مۇقاشيەۆ.
تالاپ ارىزعا ساي اناسى ۇلىنان 22 مىڭ تەڭگە اليمەنت سۇراعان ەكەن. الايدا سوت بارىسىندا تاراپتار ورتاق مامىلەگە كەلدى. از ۋاقىتقا سوزىلعان ساۋدا 7 مىڭعا كەلىپ تىرەلدى. 42 مىڭ تەڭگە جالاقى الاتىن ۇلى 70 مىڭ تەڭگە زەينەتاقىسىن جالعىز باسىنا جەتكىزە الماي وتىرعان شەشەسىنە وسى سومانى اي سايىن بەرىپ تۇرۋعا كەلىستى.
وسىدان ءۇش جارىم ايداي بۇرىن بەس بالانىڭ اناسى كاميا مۇقاشيەۆا ەكىنشى ۇلى ماربۇلاننان دا ءدال وسىنداي كولەمدە اليمەنت ونىدىرگەن. الايدا سوت شەشىمى الدەقاشان كۇشىنە ەنسە دە، ول ءالى اناسىنا ءبىر تيىن دا تولەمەپتى. كەيۋانا ەندى ونى سوت ورىنداۋشىلارى ارقىلى ءوندىرىپ كورمەك.
