قازاقستان رەسپۋبليكاسى باس پروكۋرورىنىڭ ورىنباسارى اندرەي كراۆچەنكو استانادا التى جاسار قىزدى زورلاماق بولدى دەگەن كۇدىكپەن قولعا تۇسكەن ادامدى ۇرعان ازاماتتاردىڭ ۇستىنەن قانداي جاعدايدا ءىس قوزعالۋى مۇمكىن ەكەنىن ايتتى، دەپ حابارلايدى قامشى اقپاراتتىق اگەنتتىگى ەگەمەن قازاقستانعا سىلتەمە جاساپ.
«تەكسەرۋ – ولاردىڭ ۇستىنەن قىلمىستىق ءىس قوزعاۋ دەگەن ءسوز ەمەس، دەدى ءماجىلىس دالىزىندە جۋرناليستەردىڭ سۇراعىنا جاۋاپ بەرگەن كراۆچەنكو. – ەگەر ۇستالعان ادام انا ازاماتتاردى وزىنە دورەكى كۇش قولداندى جانە ول ءوزى سول ساتتە توندىرگەن قوعامدىق ءقاۋىپتىڭ دەڭگەيىنە سايكەس كەلمەيتىن دەپ ايىپتاسا، وندا قىلمىستىق ءىس قوزعالۋى مۇمكىن. تەرگەۋ-تەكسەرۋ جۇمىستارى قىلمىستىق-پروسەسسۋالدىق كودەكستىڭ اياسىندا جۇرەدى. جايدان جاي ەشكىم جاۋاپقا تارتىلمايدى، مەن مۇنى 100 پايىز سەنىممەن ايتام».
استانادا التى جاسار قىزدى زورلاماق بولدى دەگەن كۇدىكپەن ەر ادام ۇستالعان بولاتىن. الەۋمەتتىك جەلىدە بىرنەشە ازاماتتىڭ بەلىنە دەيىن جالاڭاش ادامدى «پەدوفيل» دەپ ۇرىپ جاتقانى تۋرالى ۆيدەو تارادى. جەلىدە تاراعان باسقا دا مالىمەتتەر بويىنشا، استانادا سالىنىپ جاتقان ۆوكزالدىڭ ماڭىندا كىشكەنتاي قىزدى ايدالاعا الىپ بارا جاتقان ادامدى بايقاپ، سەرىكتەرىمەن بىرگە ارتىنان قۋعان ازاماتتىڭ ءاتى-جونى اسقار قاجىعۇماروۆ. ول شىعىس قازاقستان وبلىسىندا تۋعان، 22 جاستا، دەنەشىنىقتىرۋ كوللەدجىن بىتىرگەن. ءقازىر قۇرىلىسشى بولىپ جۇمىس ىستەيدى.
