قىزىنا كومەك قاجەت بولعان جاعدايدا اكەسى بارلىق ماسەلەلەرىن دەرەۋ شەشىپ بەرەتىن. الايدا، مىنا ءبىر وقيعا بۇلاردىڭ ءومىرىن تۇبەگەيلى وزگەرتىپ جىبەردى، دەپ حابارلايدى قامشى اقپاراتتىق اگەنتتىگى شەتەلدىك باق-قا سىلتەمە جاساپ.

«مەنىڭ قىزىم وسى جىلدىڭ 3 قاراشاسىندا تۇرمىسقا شىعۋى كەرەك بولاتىن. بۇل ءىس-شاراعا دايىندىقتىڭ ءوزى ءبىراز ۋاقىتتى الدى. مەن بۇل وگەي قىزىمنىڭ اناسىمەن نەكەگە تۇرماعانمىن، ءبىراق بىرگە تۇرىپ كەلە جاتقانىمىزعا 10 جىلدان اسا ۋاقىت بولدى.

وتكەن جىلى قىزىم جوعارى وقۋ ورنىن ءبىتىرىپ شىقتى، ونىڭ وقۋىنىڭ اقشاسىن تولىعىمەن تولەدىم. ول جۇمىس ىستەمەيتىن. ۋنيۆەرسيتەتىنە قينالماي بارىپ-كەلسىن دەپ مەن وعان كولىك ساتىپ الىپ بەردىم.

ۋاقىت وتە كەلە ول ءوزىنىڭ تۋعان اكەسىن جولىقتىردى جانە سونىمەن كوپ ۋاقىتىن وتكىزەتىن بولدى. ول قىزىنىڭ وقۋىنا ءبىر تيىن دا قوسقان ەمەس، ءبىراق اكەنىڭ اتى - اكە، قىزى ونى قاتتى جاقسى كورەتىن.

قىزىمنىڭ تويىنا 250 ادام شاقىرامىز دەپ شەشتىك. مەن قىزىما 20 ادامنان تۇراتىن ءتىزىمدى بەرىپ، تويدا سول ادامداردى كورگىم كەلەتىنىن ايتتىم. تويعا بىرنەشە كۇن قالعاندا تىزىمدە جازىلعان دوستارىمنىڭ ءبىرىن كەزدەستىرىپ قالدىم.

دوسىمنان تويعا كەلەسىڭ بە دەپ سۇراعانىمدا، ول ەشقانداي دا شاقىرۋ قاعازىن الماعانىن ايتتى. تەك توي بولاتىنىن ەستىگەن، ءبىراق شاقىرۋ قاعازى قولىنا تيمەگەن. ارينە، توي بولاتىنىن ەستىپ ول كەلە سالمايدى عوي جانە دە حابارلاندىرۋدا مەنىڭ ەسىمىم ەمەس قىزىمنىڭ تۋعان اكەسىنىڭ ەسىمى جازىلىپتى.

بىرنەشە كۇن وتكەننەن كەيىن تويعا شاقىرىلعان 250 ادامنىڭ ىشىندە مەن شاقىرعان 20 ادامنىڭ ءبىرى دە بولماعان ەكەن. بۇل جاعداي مەنىڭ بەتىمە تۇكىرگەنمەن بىردەي بولدى.

مەنىڭ اشۋلاندىرعان مۇلدە باسقا جاعداي. ءبىر كۇنى كەشكە جۇمىستان كەلسەم، ۇيىمدە بولاشاق كۇيەۋ بالام مەن ونىڭ وتباسى وتىر ەكەن. ەكى جاقتىڭ تۋىستارى بىر-بىرىمەن تانىسۋ ءۇشىن كىشىگىرىم كەشكى اس ۇيىمداستىرىپتى. ەڭ سوراقىسى ماعان بۇل كەشكى اس جايىندا ەشكىم ەشتەڭە دە ايتپاعان جانە ءبارىنىڭ نازارى قىزىمنىڭ تاعان اكەسىندە. بۇل جاعداي مەنىڭ قاتتى كوڭىلىمدى قالدىردى. ونىڭ تۋعان اكەسى قىزىنىڭ ۇيلەنۋ توي ءۇشىن نە ىستەدى؟

مەن قولىما بوكالدى الىپ، ءسوز سويلەيمىن دەدىم: «مەن ءۇشىن بۇل وتباسىنىڭ مۇشەسى بولۋ – ۇلكەن قۋانىش. وسى ادامدارمەن بىرگە بولعان ءاربىر ءساتىم باقىتقا تولى بولدى. ال ءقازىر مەن مۇلدەم باسقا ادامعا العىس ايتقىم كەلىپ وتىر: قىزىمنىڭ تۋعان اكەسىنە، ونىڭ بولاشاق كۇيەۋى مەن تۋعان-تۋىستارىنا.

سىزدەر مەنىڭ كوزىمدى اشتىڭىزدار. مەن بۇل وتباسىدا تەك بانكوماتتىڭ ءرولىن اتقارعان ەكەنمىن. تويعا شاقىرىلعان قوناقتاردىڭ ءتىزىمى مەن بۇگىنگى كەشكى استى كورگەندە مۇنى انىق بايقادىم. سالتاناتتى تۇردە جاريا ەتەمىن: مەن بۇل تويدىڭ شىعىنىن كوتەرۋدەن باس تارتامىن.

تۋعان اكەسى ءۇشىن وتە باقىتتىمىن، ءدال بۇگىن قىزىنىڭ بارلىق شىعىنىن كوتەرۋگە وعان مۇمكىندىك تۋىپ وتىر. سونىمەن قاتار، دەرەۋ مەنىڭ ءۇيىمدى بوساتىڭىزدار»، - دەيدى قىزدىڭ اكەسى.

وگەي اكەسىنىڭ بۇل ءىسىن دۇرىس ەمەس دەپ ايتۋعا كەلمەيدى. ول بۇل توي ءۇشىن ءبارىن جاساۋعا دايىن ەدى، ءبىراق ونىڭ جاقىن ادامدارىم دەپ جۇرگەندەرى بەتىنە تۇكىردى.

اۋدارعان: نازەركە لابيحان