سۋميتەرۋ تانيگۋچي ناگاساكي اپاتىنان ءتىرى قالعان جاپوندىقتاردىڭ ءبىرى دەپ حابارلايدى قامشى اقپاراتتىق اگەنتتىگى شەتەلدىك باق-قا سىلتەمە جاساي وتىرىپ.

ول 1929 جىلى دۇنيە كەلگەن ەكەن.  1945 جىلدىڭ 9 تامىزىندا ونىڭ جاسى نەبارى 16-دا بولعان. ارادا 70 جىل وتسە دە سۋميتەرۋ تانيگۋچي كورگەن ازابىن، قورقىنىشىن ۇمىتا الماي كەلەدى.

ناگاساكيگە بومبا تاستالعان تامىزدىڭ سول ءبىر كۇنى تانيگۋچي ەپيسەنتردەن 2 كم.شاقىرىم ماڭدا شايتاناربا ايداپ كەلە جاتقان. سوققى جاسالعان كەزدە ونى جەر جۇتىپ قويا جازداعانداي بولعان. بومبا تاستالعاننان كەيىنگى ءۇش كۇن بويى ول ەس-تۇسسىز كۇيدە اۋرۋحانادا جاتىپ، ءومىر ءۇشىن ارپالىسقان. ونىڭ دەنەسىنە شىمىركپەي قاراۋ مۇمكىن ەمەس-تىن. تەرى تۋرا ماعىنادا تۇسەيىن دەپ جاتقان. ايەلى كۇن سايىن جاقپاماي جاقسا دا، سول تىرتىقتار كۇنى بۇگىنگە دەيىن جانىن جەگىدەي جەپ، مازالايدى ەكەن.

ون ەكى قابىرعاسىنان قالعان جاپوندىقتىڭ ءۇش قابىرعاسى بۇگىندە قيسايىپ كەتكەن، ونىمەن قويماي وكپەسىن باسىپ، دەم الىسىنا كەدەرگى جاساۋدا. «ۋاقىت بارىنە ەمشى» دەگەنىمىزبەن تانيگۋچي سول قولىن جازا الماي-اق قويدى.

ەكى جىلى بويى ىشپەن جاتقان بوزبالا ەشنارسەگە قاراماستان ءتىرى قالدى. «ول دەمالىپ جاتىر ما؟» دەپ كۇن سايىن ول ءۇشىن قورىققان دارىگەرلەر ءۇشىن ونىڭ امان قالۋى ۇلكەن قۋانىش بولدى.

قازىرگى تاڭدا سۋميتەرۋ تانيگۋچي ناگاساكي اپاتىنان ءتىرى قالعاندار توبىن باسقارادى. ناگاساكي قاھارمانىنىڭ ايتۋىنشا، ەشكىم يادرولىق قارۋدىڭ زاردابىن تارتپاۋى ءتيىس. «مەن ول سۇمدىق قارۋدىڭ كوزى قۇرتىلعانىن قالايمىن» دەيدى جاپوندىق.

اۋدارعان: جازيرا بايدالى