جاپونيانىڭ وڭتۇستىك-باتىسىندا ورنالاسقان ۋسۋكي قالاسىندا پوليسيا قىزمەتكەرلەرى 54 جاستاعى تاكاشي يامانۋچي ەسىمدى ەر ادامدى تۇتقىنداعان. ول بىرنەشە جىلدار بويى قوعامدىق دارەتحانانىڭ شاتىرىندا تۇرىپ كەلگەن ەكەن، دەپ حابارلايدى قامشى اقپاراتتىق اگەنتتىگى شەتەلدىك باق-قا سىلتەمە جاساپ.

ۇيسىز-كۇيسىز جۇرگەن ەركەكتى سول ايماققا تەحنيكالىق قىزمەت كورسەتۋگە كەلگەن ەلەكتريك بايقاپ قالىپ، پوليسياعا حابار بەرگەن.

يامانۋچيگە قوعامدىق ورىندا رۇقساتسىز تۇردى دەگەن ايىپ تاعىلۋى مۇمكىن. ونىڭ ايتۋىنشا، يامانۋچي 10 جىل بۇرىن گيفۋ پرەفەكتۋراسىنان كەتىپ قالعان، سودان بەرى ءتۇرلى جەرلەردى پانالاپ، كۇنەلتىپ كەلەدى ەكەن. ال بۇل قوعامدىق دارەتحاناعا ول ءۇش جىل بۇرىن كەلىپ قونىستانىپتى.

پوليسيا قىزمەتكەرلەرىنىڭ مالىمدەۋىنشە، شاتىردىڭ جالپى كولەمى 92 كۆ. مەتردى قۇرايدى ەكەن. ول جەردەن ءتىنتۋ بارىسىندا ءزار تولتىرىلعان 300 بوتەلكە، ەلەكتر قىزدىرعىش، گاز پليتاسى مەن باسقا دا تۇرمىسقا قاجەتتى زاتتار تابىلعان. سونىمەن قاتار، شاتىر وتە تازا كۇيدە بولعاندىعى كورىنىپ تۇر. پوليسيا قىزمەتكەرلەرىنىڭ توپشىلاۋىنشا، تاكاشاكي بۇل شاتىرعا قونىستانىپ، وسىندا ءبىرشاما جىلدار بويى تۇرىپ كەلگەندىگى ەشكىمگە بىلدىرمەۋ ءۇشىن جارتى شاتىرداعى جارتى مەترلىك تەسىكتەن كىرىپ-شىعىپ جۇرگەن. الايدا، ول تەسىك ەندى جابىق.

اتالمىش وقيعادان كەيىن ۋسۋكي قالاسىنداعى بيلىك وكىلدەرى قالاداعى قوعامدىق دارەتحانالاردىڭ بارلىعىن تەكسەرىپ شىقتى، الايدا باسقا جەرلەردەن مۇنداي تۇرعىندار تابىلماعان.

كەدەيلىك پەن جوقشىلىق ادامداردى ءتۇرلى جەرلەردە كۇنەلتۋگە يتەرمەلەيتىن جالعىز جاپونيا ەلىندە عانا ەمەس. ەستەرىڭىزگە سالا كەتسەك، 2013 جىلى پەكين قالاسىندا جەراستى تەسىگىندە 20 جىل بويى تۇرىپ كەلگەن قىز ۇستالعان بولاتىن.

اۋدارعان: نازەركە لابيحان