5 مامىردا الماتى قالاسىنداعى ساتبايەۆ اتىنداعى قازاق ۇلتتىق تەحنيكالىق ۋنيۆەرسيتەتىنىڭ ۇلكەن زالىندا ءانشى يبراگيم ەسكەندىردىڭ «كوك تۋدىڭ جەلبىرەگەنى» اتتى پاتريوتتىق كونسەرتى ءوتتى. تىڭدارماندى رۋحتى اندەرمەن تەربەتكەن ەرەكشە كونسەرتتەن كەيىن ق ر «دارىن» مەملەكەتتىك سىيلىعىنىڭ يەگەرى، پاتريوتتىق اندەردىڭ ورىنداۋشىسى يبراگيم ەسكەندىردى از-كەم اڭگىمەگە تارتتىق. «ەلگە، جەرگە، وتانعا دەگەن ماحاببات ونىڭ رامىزدەرىن قۇرمەتتەۋدەن باستالادى» دەيتىن ەلباسىمىزدىڭ ءسوزى بار دەپ اڭگىمەسىن باستادى ءانشى. 

ءانشىنىڭ ايتۋىنشا بۇل كونسەرت «كوك تۋدىڭ جەلبىرەگەنى» اتتى جوبا اياسىندا ۇيىمداستىرىلىپ وتىر. «جاس وتان» جق ق ر پرەزيدەنتى نۇرسۇلتان ءابىش ۇلى نازاربايەۆتىڭ «بولاشاققا باعدار: رۋحاني جاڭعىرۋ» اتتى ماقالاسىنداعى «جاڭا تۇرپاتتى جاڭعىرۋدىڭ ەڭ باستى شارتى - ۇلتتىق كودىڭدى ساقتاي ءبىلۋ» دەگەن ءسوزىن نەگىزگە الا وتىرىپ، ق ر مەملەكەتتىك رامىزدەرىنىڭ 25 جىلدىق مەرەكەسىنە وراي «كوك تۋدىڭ جەلبىرەگەنى» اتتى جاڭا جوبانى قولعا العان.

اتالمىش جوبا اياسىندا «كوك تۋدىڭ جەلبىرەگەنى» انىمەن تانىمال بولعان، كەشە عانا تۇساۋى كەسىلگەن «ويان قازاق!» انىمەن كورەرمەن ىقىلاسىنا بولەنگەن، «جاس تۇلپار» قوزعالىسىنىڭ 50 جىلدىعىنا وراي «ەڭ ۇزدىك پاتريوتتىق ولەڭ» نوميناسياسى بويىنشا «جاس تۇلپار» سىيلىعىنىڭ يەگەرى اتانعان يبراگيم ەسكەندىر العاشقىلاردىڭ ءبىرى بولىپ ەرەكشە پاتريوتتىق جوبانى قولعا الىپ، ەلدى ارالاۋعا شىققان.

ول الماتىعا دەيىن 2 مامىردا قىزىلوردا قالاسىنداعى اسقار توقماعانبەتوۆ اتىنداعى كونسەرت زالىندا كونسەرت بەردى. بۇكىلرەسپۋبليكالىق كونسەرتىن يبراگيم ەسكەندىر ادەيىلەپ العاشقى استانامىز بولعان قىزىلوردا قالاسىنان باستاعان. ودان ءارى كونسەرت شىمكەنت، تاراز، الماتى قالالارىندا ءوتىپ، ەلىمىزدىڭ باسقا دا ايماقتارىندا جالعاسىن تاپپاق. بۇگىن ءانشى جەتىسۋ وڭىرىندە، تالدىقورعان قالاسىندا تىڭدارمانىمەن جولىعادى.

جىل سوڭىندا الماتى مەن استانادا ونەر ساپارىن قورىتىندالاپ، گالا كونسەرت بەرۋدى جوسپارلاعان ءانشى ەلدىڭ تۇكپىر-تۇكپىرىندە كونسەرت قويۋ بارىسىندا تەك ونەرىن پاش ەتىپ قانا قويمايدى، حالىقتىڭ ءتۇرلى الەۋمەتتىك ماسەلەلەرىمەن تانىسىپ، ەلدىڭ جايىمەن قانىعىپ، پارتيا دەڭگەيىندە شەشىلۋىنە كۇش سالاتىن بولادى.

ايتا كەتەرلىگى، ءانشىنىڭ رەپەرتۋارى ءبىرقاتار پاتريوتتىق اندەرمەن تولىققان. ايدىڭ باسىندا يبراگيم ەسكەندەردىڭ «ويان، قازاق» ءانى تىڭدارماندارىنا جول تارتقان ەدى. «ويان، قازاق» قىزىلوردا دا العاش رەت شىرقالسا، الماتىداعى كونسەرتتە ءانشىنىڭ رەپەرتۋارى تاعى ءبىر پاتريوتتىق «الەمدە بار قازاقتا ءبىر وتان بار» اتتى ءاننىڭ تۇساۋى كەسىلدى.  ءان اۆتورى ەرلان تولەۋبايدىڭ ايتۋىنشا اتالمىش انگە «ەلباسى-كۋرستاستارى» قورىنىڭ ۆيسە پرەزيدەنتى قۇلان چۋرەنوۆ پەن كەڭەسشىسى مۇحامبەتكارىم(تورعاي) ەلەۋبايدىڭ قولداۋىمەن كليپ تۇسىرىلەدى. 

سۇحباتتاسقان: نۇرعالي نۇرتاي