استاناداعى قازاق ەلى الاڭىندا ق ر قارۋلى كۇشتەرىنىڭ 25 جىلدىعىنا ارنالعان اسكەري پاراد ءوتتى دەپ حابارلايدى قامشى اقپاراتتىق اگەنتتىگى. بۇعان دەيىن حابارلاعانىمىزداي، بۇل تاۋەلسىز قازاقستان تاريحىنداعى ەڭ ۇلكەن اسكەري پاراد بولدى. پارادتى Facebook جەلىسىنەن "اتامەكەن بيزنەس ارناسى" تىكەلەي ەفيردەن كورسەتتى.

الاڭعا ەلباسى  قارۋلى كۇشتەردىڭ جوعارعى باس قولباسشىسى نۇرسۇلتان نازاربايەۆ كەلدى.

«قارۋلى كۇشتەرىمىز ءار ۋاقىتتا دا  تاۋەلسىزدىگىمىزدىڭ باستى تىرەگى بولىپ قالا بەرەدى. سىزدەر وزدەرىڭىزدىڭ قاسيەتتى بورىشتارىڭىزدى ادال اتقارىپ، تۋعان  جەرىمىزدىڭ تىنىشتىعىن قورعاڭىزدار، وزدەرىڭىزدىڭ كاسىبي شەبەرلىكتەرىڭىزدى، جاۋىنگەرلىك داعدىلارىڭىزدى ارتتىرىپ، جاۋىنگەرلىك باۋىرلاستىق پەن بىرلىكتى نىعايتىڭىزدار. مەرەيتويلىق شەرۋدىڭ قازاقستاندىق ارميانىڭ اسكەري قۋاتىن، جوعارى رۋحىن كورسەتەتىندىگىنە سەنىمدىمىن»، - دەدى پرەزيدەنت.

ق ر قورعانىس ءمينيسترى ساكەن جاسۇزاقوۆقا اسكەري پاراد قولباسشىسى، ق ر قارۋلى كۇشتەرى قۇرلىق اسكەرىنىڭ باس قولباسشىسى، گەنەرال مايور مۇرات بەكتانوۆ اسكەري پاراد تۋرالى بايانات جاسادى. قورعانىس ءمينيسترى ەلباسىنا - باس قولباسشىعا پاراد دايىن دەپ باياندادى.

شەرۋدە 5000-نان استام اسكەري قىزمەتشىلەر سالتاناتتى مارشپەن ءجۇرىپ ءوتتى، 300-گە جۋىق اسكەري تەحنيكا مەن زاماناۋي قارۋ-جاراق تۇرلەرى جۇرتشىلىق نازارىنا ۇسىنىلدى. 70-كە جۋىق اۋە تەحنيكاسى قازاقستاننىڭ اۆياسيالىق الەۋەتى مەن جاۋىنگەرلىك ازىرلىگىن پاش ەتتى.