مەملەكەتتىك مەكەمەلەرگە ۇلگى بولارلىق اياق كيىم دۇكەنى - «SMAN»
تاۋەلسىزدىك العالى بەرى ءوز مادەنيەتىمىز بەن ءتىلىمىزدى الدىڭعى قاتارعا قويىپ، ءوزىمىز بي ءوزىمىز قوجا بولا الماي جۇرگەنىمىز بارىنە ايقىن. جەكە ساۋدا ورىندارى تۇگىلى مەملەكەتتىك قىزمەت كورسەتۋ ورىندارىنىڭ وزىندە دە انا ءتىلىمىز ءوز دەڭگەيىندە قاستەرلەنبەي كەلەدى. تاۋەلسىزدىگىمىزگە شيرەك عاسىر ۋاقىت وتسە دە قۇلدىق سانادان ارىلا الماۋدامىز.
ەگەر الماتى قالاسىندا مەملەكەتتىك ورگانداردى ەسەپكە الماعاندا، ساۋدا ورىندارىنان مەملەكەتتىك تىلدە جوعارى دەڭگەيدە قىزمەت كورسەتە الاتىن جالعىز دۇكەن بار دەسەك ، ءبىز قايعىرامىز با؟ الدە تاڭعالىپ، وعان قۋانامىز با؟ ارينە، ءتىلىمىزدىڭ كەندە قالىپ وتىرعانىن وسىدان-اق بايقاۋعا بولادى.
«SMAN»
بۇل الماتىداعى «مega، Dostyk Plaza» سىندى ويىن-ساۋىق جانە ساۋدا ورتالىقتارىندا ورنالاسقان اياق-كيىم دۇكەنى.
ايتايىن دەپ وتىرعانىم اياق كيىم جايىندا ەمەس، ولاردىڭ قىزمەت كورسەتۋ ەرەكشەلىكتەرى جايىندا.
ءوزىم بۇل دۇكەندە بىرنەشە رەت بولدىم. كەز-كەلگەن ادامنىڭ تاڭدانىسىن تۋعىزاتىن جايت - دۇكەننىڭ قىزمەتكەرلەرى.
ءار جولى بارعانىڭدا ولاردىڭ قازاق تىلىندە، تاماشا ىرعاقپەن ساتىپ الۋشىلاردى وزدەرىنە باۋراپ الاتىندىقتارى كوڭىلىمدى ءبىر مارقايتىپ تاستايتىن.
جۋرناليست رەتىندە وسىنى ءبىر جازسام، وزگەلەرگە ۇلگى بولسا دەگەن نيەت كوپ ۋاقىتتان بەرى ويىمدا ءجۇردى.
مىنە، ءساتى ءتۇسىپ، سۇحبات الۋعا بارىپ قايتتىم.
جالپى ۇجىمنىڭ ايتۋى بويىنشا، بۇل دۇكەن وسىدان 3 جىل بۇرىن ءوز جۇمىسىن باستاعان ەكەن.
دۇكەننىڭ «Mega centre» ويىن ساۋىق ورتالىعىنداعى بەكارىس اباي ۇلى ەسىمدى قىزمەتكەرىمەن سۇحباتتاستىق.
سىزدەردىڭ مەملەكەتتىك تىلگە باسا نازار اۋدارۋلارىڭىزعا نە سەبەپ؟
مەملەكەتتىك ءتىل قازاق ءتىلى بولعاندىقتان ءبىز ونى ءبىرىنشى ورىنعا قويامىز. سەبەبى ۇلتىمىز قازاق بولعاندىقتان، وسى ەلدىڭ ازاماتى بولعاندىقتان بۇل ءبىزدىڭ پارىزىمىز.
وسى دۇكەننىڭ الماتىداعى بارلىق بولىمشەلەرىندە وسىلاي قىزمەت كورسەتىلەدى مە؟
ءيا، ءبىز جۇمىسقا قىزمەتكەر قابىلدايتىن كەزدە، ەڭ باستى نازار اۋداراتىن تالابىمىز ول ءتىل تازالىعى. ءبىزدىڭ باسشىلىقتىڭ تالابى وسى. ياعني جۇمىسقا قوس ءتىلدى وتە جوعارعى دەڭگەيدە مەڭگەرگەن ازاماتتار الىنادى.
سىزدەر تەك بارلىق ۇلت وكىلدەرىنە دە وسىلاي قىزمەت كورسەتەسىزدەر مە؟
بىزگە كەلگەن كليەنت قازاق بولسا، ءبىز ونىڭ ورىس ءتىلدى ەكەنىنە قاراماستان بارىنشا قازاق تىلىندە قىزمەت كورسەتۋگە تىرىسامىز. ال ەگەر تۇسىنبەي بارا جاتسا، ورىس تىلىنە كوشۋىمىزگە تۋرا كەلەدى. ءبىز بارىنشا قازاق ءتىلىنىڭ تۋىن بيىك ۇستاۋعا تىرىسامىز.
«SMAN» برەندىنىڭ اياق كيىمدەرى قاي ەلدە تىگىلەدى، الدە وتاندىق ءونىم بە؟
ءبىز بۇل اياق كيىمدەردى تۇركيادان اكەلەمىز. ال سمان دەگەنىمىز ول ءوزىمىزدىڭ قازاقي ەسىم. ءبىزدىڭ اياق كيىمنىڭ ساپاسى وتە جوعارى، جانە سيىر، قوي تەرىسىنەن تىگىلەدى. بۇل تەرىنىڭ تۇرلەرى ورگانيزمگە زيان كەلتىرمەيدى. ال تابانىنا كەلەر بولساق، يتاليادا تىگىلەتىن اياق كيىم تاباندارى ءبىزدىڭ اياق كيىمدەردە دە قولدانىلعان. باعاسى سالىستىرمالى تۇرعىدا، وزگە برەندتەردەن الدەقايدا ارزان. بىزدەگى ورتاق باعا 25-30 مىڭنىڭ ارالىعىندا. مۇنداي ساپا ءۇشىن بۇل ارينە قول جەتىمدى.
سىزدەر وسىلاي قىزمەت كورسەتىپ، ءدۇيىم جۇرتتى وزدەرىڭىزگە باۋراپ كەلەسىزدەر. سىزدەرگە قاراپ بوي تۇزەپ، وسىلاي مەملەكەتتىك تىلگە كوڭىل ءبولىپ جاتقاندار بار ما؟
ارينە، بىزگە كوپتەگەن ەلگە تانىمال تۇلعالار كەلىپ جاتادى. ەستيتىنىمىز كوپ كومپانيالار ءوز قىزمەتكەرلەرىنە «SMAN-نىڭ» جىگىتتەرىنەن ۇيرەنىڭدەر دەپ، ءبىزدى ۇلگى ەتىپ وتىراتىن كورىنەدى. بۇل ارينە، قۋانارلىق ناتيجە.
ءتىپتى، كەيبىر كليەنتتەر اياق كيىم الماسا دا بىزبەن سويلەسىپ، قىزمەتىمىزدى تاماشالاپ كەتۋگە قۇمار. قازاق ءتىلى – وتە كوركەم ىرعاقتى ءتىل. مەنىڭشە، ءقازىر قوعامدا ءتىلدى دۇرىس پايدالانا الماعاندىقتان ونىڭ قادىر-قاسيەتىن باعالاي الماي جاتىرمىز. ءار ءتىلدى ءوز كەمەلىندە كوركەمدەپ سويلەسە، ول تىڭداۋشىنىڭ قۇلاعىنا جاعارى ءسوزسىز. ءبىز انا تىلىمىزدە دۇرىس سويلەي ءبىلۋ كەرەكپىز.
سىزدەرگە تابىس، ەڭبەكتەرىڭىزگە بەرەكەت، ءاردايىم قازاق ءتىلىنىڭ ابىرويىن اسقاقتاتىپ جۇرە بەرۋلەرىڭىزگە تىلەكتەسپىن.
