2030 جىلعا دەيىنگى كەزەڭگە زەينەتاقى جۇيەسىن جاڭعىرتۋ تۋرالى ۇكىمەتتىڭ جاساعان جاڭا تۇجىرىمداماسىمەن تانىسقان ماجىلىستەگى كومپارتيا فراكسياسى ونى حالىقتىڭ جوعىن جوقتاعان قۇجات ەمەس دەپ تاپتى.

جالپى، زەينەتاقى جيناقتاۋ جۇيەسى ورتاشا ەڭبەكاقىدان ارتىق الاتىندارعا عانا ءتيىمدى ەكەنى باياعىدان بەلگىلى بولعان. ءبىزدىڭ، اۋىلدا تۇراتىن 7،7 ملن. اعايىننىڭ جۇمىس ىستەيتىنىنىڭ ورتاشا ەڭبەكاقىسى 64500 تەڭگە عانا. ال جەكەمەنشىك قوسالقى شارۋاشىلىعى جانە باسقا دا تابىس كوزدەرىمەن ءوزىن-وزى اسىراپ وتىرعاندارىنىڭ ايلىق ورتاشا تابىسى جان باسىنا شاققاندا ءتىپتى 32400 تەڭگە عانا. وسىنداي تابىسپەن ولار قارتتىعىن قامتاماسىز ەتە الاتىن زەينەتاقى قوردالاندىرا الا ما؟ ارينە، قوردالاندىرا المايدى. دەمەك، اركىم وزدەرىنە ءوزى قوردالاندىرسىن دەگەن مىنا تۇجىرىم اقساقالدارىمىزدىڭ نەگىزگى بولىگىن ەرتەڭگى كۇنى قيىن جاعدايعا تاپ قىلاتىنى ءسوزسىز.

ونىڭ ۇستىنە زەينەتاقى قورىنىڭ تابىستىلىعىن ارتتىرۋ ماسەلەسى دە «قازاقستاننىڭ قاراجات سەكتورىن دامىتۋ» اتتى تۇجىرىمداماسىنا ەنەدى دەگەن ءۇمىت تە كەسىلىپ وتىر. بۇگىنگى كۇنى زەينەتاقى قورىنداعى قاراجات بارلىق بانك اكتيۆتەرىنىڭ تورتتەن ءبىرىن قۇرايدى. الايدا سوعان قاراماي ونىڭ قاراجات سەكتورىنىڭ قاتارىنا ەنگىزىلمەگەنى قىزىق. ەگەر قاراجات سەكتورىنا ەنگىزىلسە ونى ينۆەستيسيا رەتىندە ءوسىمدى جوبالارعا سالۋعا بولاتىن ەدى. ءسويتىپ، وزدىگىنەن تابىس تابۋعا جول اشىلاتىن ەدى عوي.

اتالمىش تۇجىرىمداما زەينەتاقى قورىنا تەك بانكتەردىڭ تۇراقتىلىعىن ساقتاۋ مەن قوردالاندىرۋ ءرولىن عانا بەرگەن. بۇل – زەينەتاقى قورى تەك بانكىگە قىزمەت ەتەدى دەگەن ءسوز. سوندىقتان ونىڭ ءوسىمى تۋرالى ءسوز قوزعاۋدىڭ ءوزى ارتىق.  ءماجىلىستىڭ سوڭعى پلەنارلىق وتىرىسىندا كوممۋنيستەر فراكسياسى دەپۋتات ايقىن قوڭىروۆتىڭ اۋزىمەن وسىنداي ماسەلەلەردى ايتا كەلىپ، پرەمەر-مينيستر ك.ماسىموۆتەن مىناداي ماسەلەلەرگە جاۋاپ بەرۋىن سۇراپ، دەپۋتاتتىق ساۋال جولدادى:

«ءبىز جوعارىدا ءوزىن-وزى اسىراپ وتىرعان تابىسى از تۇرعىندار مەن ەڭبەكاقىسى تومەن جانداردىڭ جيناقتاعان قورى مۇلدە از بولاتىنىن ايتتىق، سوندا ۇكىمەت ولاردى ەرتەڭگى كۇنى زەينەتاقىمەن قالاي قامتاماسىز ەتپەك؟

ازاماتتاردىڭ زەينەتاقى قورىنىنىڭ تابىستىلىعىن  ارتتىرۋ تۋرالى ۇكىمەت قانداي شارالار جوسپارلاپ وتىر؟ ەگەر وندايلار بار بولسا، ايتۋىڭىزدى وتىنەمىز.   

 سونىمەن قاتار كوممۋنيستەر ك.ماسىموۆكە زەينەتاقى قورىنىڭ قاراجاتىن قالالاردا تۇرعىن-ۇيلەر سالۋدى ينۆەستيسيالاۋعا جۇمساۋ كەرەكتىگىن ايتىپ، ۇسىنىس جاسادى. سوندا بۇل قاراجات جوعالماي، ەلىمىزدەگى ءتۇرعىن-ۇي ماسەلەسىنىڭ شەشىلۋىنە قاتىسىپ، عيمارات رەتىندە قالقايىپ تۇرار ەدى عوي دەپ ويلايدى كوممۋنيستەر. ءبىراق ولاردى ءوزىم عانا بىلەمىن دەيتىن ۇكىمەت قولداي قويار ما ەكەن؟ ونى ەندى بولاشاق كورسەتەدى.  

ا.الپىسبايەۆ