«سالت-داستۇرلەرىمىز، ءتىلىمىز بەن مۋزىكامىز، ادەبيەتىمىز، جورالعىلارىمىز، ءبىر سوزبەن ايتقاندا ۇلتتىق رۋحىمىز بويىمىزدا ماڭگى قالۋعا ءتيىس».

            2017 جىلدىڭ 11 مامىرىندا ورتالىق كوممۋنيكاسيالار قىزمەتىندە «قازاقستان» رترك» اق ۇيىمداستىرۋىمەن «مەن قازاقپىن» اتتى حالىقارالىق مەگاجوباعا بايلانىستى باسپا ءسوز ماسليحاتى ءوتتى دەپ حابارلايدى قامشى اقپاراتتىق اگەنتتىگى.  

            شاراعا ق ر اقپارات جانە كوممۋنيكاسيالار ءمينيسترى داۋرەن ابايەۆ پەن «قازاقستان» رترك» اق باسقارما ءتوراعاسى ەرلان قارين قاتىستى.

            «قازاقستان» رترك» اق اتادان بالاعا ميراس بولعان ۇلت ونەرىن ۇرپاققا ناسيحاتتاۋ ماقساتىندا «مەن-قازاقپىن» اتتى حالىقارالىق مەگاجوباعا بايقاۋ جاريالادى. بۇل اۋقىمدى بايقاۋعا قازاقستاندىقتاردان باسقا، رەسەي، جۇڭگو حالىق رەسپۋبليكاسى، مونعوليا مەن التايدا تۇراتىن قانداستارىمىز دا قاتىسىپ، قازاق ونەرىنىڭ باي مۋزىكاسىن حالىققا كەڭىنەن تانىتۋعا جول اشاتىن بولادى.

            جوبانىڭ ماقساتى، ءتول ونەرىمىز -  جىر-تەرمەلەردى، كۇيدى ودان ءارى دامىتىپ، بۇگىنگى كۇن تالابىنا سايكەس جاڭاشالاندىرىپ، وسكەلەڭ ۇرپاققا جەتكىزۋ. ءاربىر وبلىس ورتالىقتارىندا ارنايى  ىرىكتەۋ تۋرلارى وتكىزىلىپ، ەڭ جۇيرىكتىلەرى رەسپۋبليكالىق تەليەۆيزيالىق بايقاۋعا جولداما الادى.  ەلىمىزگە تانىمال تەرمەشىلەر، كۇيشىلەر مەن جىرشىلاردان قۇرالعان قازىلار القاسى قاتىسۋشىلاردى ىرىكتەپ الادى.

            بايقاۋعا قاتىساتىن ۇمىتكەرلەردىڭ ساحنالىق كيىمى قازاقى ۇلگىمەن تىگىلگەن، بۇگىنگى زامانعا ساي بولۋى كەرەك.

سونداي-اق، باسقارما ءتوراعاسى جوبانىڭ ىرىكتەۋ تۋرلارى بويىنشا ارنايى كەستە قۇرىلعانىن اتاپ ءوتتى. وڭىرلەردەگى العاشقى بايقاۋلار الماتى قالاسى جانە اقتوبە وبلىسىنان ماۋسىم ايىنىڭ 5-نەن باستالادى. شىلدەدە رەسەي، جۇڭگو جانە موڭعوليادا بايقاۋلار وتكىزىلەدى. ىرىكتەۋ تۋرىنان تۇسىرىلگەن كۇندەلىكتەر ۇلتتىق ارنا ەفيرىنەن 9-27 تامىز ارالىعىندا كورسەتىلەدى.

ال، جوبا كورەرمەنگە اعىمداعى جىلدىڭ 3-قىركۇيەگىنەن باستاپ جول تارتادى. «كۇندەلىكتەردى ءتۇسىرۋ ماقساتىندا ارنايى ەكى شىعارماشىلىق توپ قۇرىلدى. ءبىر توپتى تانىمال كۇيشى ايبەك بەكبوسىن، ەكىنشى توپتى ءداستۇرلى ءانشى اللاجار قايبار جۇرگىزەدى. جوبانى جۇزەگە اسىرۋ ءۇشىن وبلىستىق فيليالدار اتسالىساتىن بولادى»، - دەدى ە.قارين.

ايتا كەتسەك، جوبا 10-جەلتوقساندا قورىتىندىلانىپ، تاۋەلسىزدىك كۇنى قارساڭىندا ەلوردادا گالا-كونسەرت ۇيىمداستىرىلاتىن بولادى.

ۇمىتكەرلەردىڭ تاپسىراتىن قۇجاتتارى:

-     جەكە باس كۋالىكتەرىنىڭ كوشىرمەسى؛

-     ءومىربايانى؛

-     وقيتىن (وقۋشىلار مەن ستۋدەنتتەر ءۇشىن)، جۇمىس ىستەيتىن جەرىنەن انىقتاما؛

-      ساپالى ەلەكتروندى نۇسقاداعى سۋرەتى؛

-      ءار كەزەڭدە ورىندالاتىن شىعارمالار ءتىزىمى.

كونكۋرسقا قاتىسۋشىلاردىڭ وتىنىشتەرى كونكۋرستىڭ باستالۋىنان 20 كۇن بۇرىن جەرگىلىكتى جەردەگى ۇيىمداستىرۋشىلاردىڭ ەلەكتروندى ادرەسىنە جىبەرىلۋى ءتيىس: 

            بايقاۋدىڭ جەڭىمپازدارى استانا قالاسىندا باس قوسىپ، باعدارلاما اياسىندا ارنايى ستاتۋەتكامەن، سونىمەن قاتار، «جىلدىڭ ەڭ ۇزدىك ءداستۇرلى ءانشىسى»، «جىلدىڭ ەڭ ۇزدىك تەرمەشىسى»، «جىلدىڭ ەڭ ۇزدىك كۇيشىسى» جانە بايقاي لاۋرەاتى نوميناسيالارىمەن ماراپاتتالادى. بايقاۋ بويىنشا تولىق اقپارات الۋ ءۇشىن ستراتەگيالىق ماركەتينگ دەپارتامەنتىنە حابارلاسۋ قاجەت.