فينليانديانىڭ پرەزيدەنتى ساۋلي نيننيستە استاناداعى ەكسپو-2017 حالىقارالىق كورمەسىنە كەلۋدى جوسپارلاپ وتىر، دەپ xابارلايدى قامشى اقپاراتتىق اگەنتتىگى قازاقپاراتقا سىلتەمە جاساپ.

بيىل 19 ماۋسىمنان باستاپ استانا-حەلسينكي باعىتى بويىنشا ەكى ەل اراسىنداعى تىكەلەي اۋە رەيسى اشىلادى. بۇدان بولەك، 18-19 ماۋسىم كۇندەرى ەلوردادا وۋلۋ قالاسىنىڭ مادەني كۇندەرى ۇيىمداستىرىلادى.

وسىنىڭ بارلىعى فينليانديا پرەزيدەنتى ساۋلي نيننەستەنىڭ قازاقستانعا جاسايتىن ساپارى اياسىندا وتەدى. نيننەستە استاناداعى ەكسپو - 2017 كورمەسى اياسىنداعى فينليانديانىڭ ۇلتتىق كۇنى مەرەكەسىنە قاتىسادى. اتالعان شارا وسى ەلدىڭ پاۆيلونىندا وتەدى. ق ر سىرتقى ىستەر ءمينيسترىنىڭ ورىنباسارى رومان ۆاسيلەنكونىڭ ايتۋىنشا، فين باسشىسىنىڭ ساپارى 19-21 ماۋسىمعا جوسپارلانىپ وتىر.

ايتا كەتەيىك، فينليانديا سولتۇستىك ەۋروپا ەلدەرى ىشىندە قازاقستاننىڭ نەگىزگى ساۋدا-ەكونوميكالىق ارىپتەسى ءارى ءىرى ينۆەستورى بولىپ سانالادى.

شولۋشى: گۇلىم جاقان