ەۋروپامەن ۆيزاسىز رەجيم ورناتقان ۋكراينا رەسەيمەن بايلانىسىن تولىعىمەن ۇزبەك، دەپ جازادى قامشى اقپاراتتىق اگەنتتىگى.

ۋكراينا پرەزيدەنتى پەتر پوروشەنكو "1+1" ارناسىنا بەرگەن سۇحباتىندا "ۆيزاسىز رەجيمگە قول جەتكىزۋ – رەسەيمەن بايلانىستى ءۇزۋ" ەكەنىن ايتتى.

«بۇگىنگى كۇنى ۋكراينا رەسەيمەن بايلانىسىن تولىعىمەن ءۇزدى دەپ ايتا الامىن. مۇنى ءدال وسىلاي دەپ «فيلوسوفيالىق تۇرعىدا» قابىلداۋىمىز ءجون»، - دەدى پوروشەنكو.

ونىڭ ايتۋىنشا، ۋكراينا ەۋروپاعا قايتىپ قوسىلماق.

«اڭگىمەنىڭ ءتۇپ توركىنى رەسەيمەن بايلانىستىڭ ۇزىلگەنىندە ەمەس، ءوز جەرىمىزدى تاريحي ولكەسىنە قايتارۋ باستى مەجەدە تۇر»، دەپ قوستادى پرەزيدەنت.

2015 جىلدىڭ جەلتوقسانىندا ەۋروپالىق كوميسسيا ۋكراينا ۆيزاسىز رەجيمگە وتۋگە دايىن ەكەنىن مالىمدەگەن، سەبەبى ۋكراينا تاراپىنان بارلىق تالاپتار ورىندالعان. 2016 جىلدىڭ كۇزىندە ەۋروپاعا ۆيزاسىز ءوتۋ جوباسى ۋكراينا حالقى ءۇشىن ەۋروپالىق پارلامەنت مۇشەسىندە قارالدى. ال قاراشا ايىندا ەو كەڭەسى جوبانى ماقۇلدادى.

2017 جىلدىڭ 9 ناۋرىزىندا ەۋروپالىق پارلامەنت كوميتەتىنىڭ ادام قۇقىقتارى جونىندەگى ادىلەت جانە ىشكى ىستەرى ۋكراينادا ۆيزاسىز رەجيم ورناتۋ تۋراسىنداعى جوبانى بەكىتتى.

26 ساۋىردە مەملەكەتتەردىڭ تۇراقتى وكىلدەرى – ەو مۇشەلەرى قولدادى.

پوروشەنكو 17 مامىردا ستراسبۋرگتە ۆيزاسىز رەجيم جايىندا كەلىسىمگە قول قويادى دەپ كۇتىلۋدە. ول ەو «رەسمي جۋرنالىندا» جاريالانعان سوڭ 20 كۇننەن كەيىن كۇشىنە ەنەدى.  

شولۋشى: گۇلىم جاقان