ەلباسى نازاربايەۆ ۋنيۆەرسيتەتىنىڭ باسشىسى شيگەو كاتسۋدى اقوردادا قابىلدادى.

76 جاستاعى ەلباسى شەتەلدىك باسشىمەن اعىلشىن تىلىندە سۇحبات جاسادى. ۋنيۆەرسيتەت جۇمىستارى جايلى سۇراپ، كاتسۋدىڭ بايانداماسىن تىڭدادى، دەپ جازادى قامشى اقپاراتتىق اگەنتتىگى.

كەزدەسۋدە مەملەكەت باسشىسىنا ءبىلىم بەرۋ مەكەمەسىنىڭ جۇمىس ناتيجەلەرى تۋرالى ەسەپ بەرىلىپ، ۋنيۆەرسيتەتتىڭ قۇرىلعانىنان بەرگى جەتىستىكتەرى جانە ونى بۇدان ءارى دامىتۋ جوسپارلارى جونىندە باياندالدى. ەلباسىعا “نازاربايەۆ ۋنيۆەرسيتەتى” دەربەس ءبىلىم بەرۋ مەكەمەسى 7 جىلداعى ءوز جۇمىسى بارىسىندا جەتەكشى حالىقارالىق جوعارى وقۋ ورىندارىنىڭ ۇزدىك تاجىريبەسىن قابىلداعانى، سونداي-اق وقۋ ورنىندا بولاشاعىنان ءۇمىت كۇتتىرەتىن ەڭ دارىندى ستۋدەنتتەردى ىرىكتەۋگە سەپتىگىن تيگىزەتىن مەريتوكراتيا قاعيداتى ەنگىزىلگەنى مالىمدەلدى.

 ال كەزدەسۋدەگى حالىقتىڭ نازارىن وزىنە اۋدارعان تۇسى ەلباسىنىڭ سۇحباتتى «Please، your report» دەپ اعىلشىن تىلىندە باستاۋى. نازاربايەۆتىڭ ورىس ءتىلىن جەتىك مەڭگەرگەنى بارىنە ءمالىم. ال ەندى اعىلشىن ءتىلى ءۇشىن دە اۋدارماشىنى كەرەك ەتپەي تۇرعانىن بايقايمىز.

شولۋشى: گۇلىم جاقان