مەملەكەت باسشىسى نازاربايەۆ ۋنيۆەرسيتەتىنىڭ رەكتورى شيگەو كاتسۋدى قابىلدادى، دەپ حابارلايدى قامشى اقپارات اگەنتتىگى اقوردانىڭ رەسمي سايتىنىڭ مالىمەتىنە سۇيەنىپ. 
ەلباسىنا ءبىلىم بەرۋ مەكەمەسىنىڭ جۇمىسى مەن الداعى دامۋ جوسپارى باياندالدى. شيگەو كاتسۋ 7 جىل ىشىندە ۋنيۆەرسيتەت الەمنىڭ جەتەكشى ءبىلىم وردالارىنىڭ تاجىريبەسىن مەڭگەرىپ، مەريتوكراتيا قاعيداسى ەنگىزىلگەنىن تىلگە تيەك ەتتى. جاڭاشىلدىق ەلىمىزدىڭ ەڭ ۇزدىك ستۋدەنتتەرىن ىرىكتەۋگە پارمەن بەرگەنى ايتىلدى. سونداي-اق ءبىلىم ورداسىنىڭ باسشىسى ۋنيۆەرسيتەت جانىنداعى زەرتتەۋ ينستيتۋتى وڭ جولعا قويىلعانىن اتاپ ءوتىپ، بيىل نازاربايەۆ ۋنيۆەرسيتەتىنىڭ تۇلەكتەرى ءۇشىنشى رەت تۇلەپ ۇشاتىندىعىن جەتكىزدى.

شيگەو كاتسۋ، «نازاربايەۆ ۋنيۆەرسيتەتى» دەربەس ءبىلىم بەرۋ مەكەمەسىنىڭ پرەزيدەنتى: -مەن مەملەكەت باسشىسىنا نازاربايەۆ ۋنيۆەرسيتەتىنىڭ دامۋ قارقىنى جايلى باياندادىم. بيىل ءبىزدىڭ ءبىلىم وردامىزعا جەتى جىل تولدى. ۋنيۆەرسيتەتتىڭ الەۋەتىن ارتتىرا ءتۇسۋ ءۇشىن ۇنەمى تىنىمسىز تەر توگىپ، زامان تالابىنا ساي بولۋ قاجەت. وسىنداي مىقتى زەرتتەۋ ينستيتۋتى ەل يگىلىگىنە قىزمەت ەتىپ، تىڭ تەحنولوگيالاردى يگەرۋگە پارمەن بەرەدى.

شولۋشى: ايگەرىم تاۋباي