قازاقستان رەسپۋبليكاسىنىڭ مەملەكەتتىك حاتشىسى گۇلشارا ءابدىقالىقوۆا «ارداگەرلەر ۇيىمى» رەسپۋبليكالىق قوعامدىق بىرلەستىگىنىڭ قۇرىلعانىنا 30 جىل تولۋىنا ارنالعان سالتاناتتى جينالىسقا قاتىستى، دەپ حابارلايدى قامشى اقپاراتتىق اگەنتتىگى اقوردانىڭ باسپا ءسوز قىزمەتىنە سىلتەمە جاساپ.

ارداگەرلەر ۇيىمى 1987 جىلعى 21 ناۋرىزدا قۇرىلعان. بىرلەستىك قۇرامىندا 1 ملن 845 مىڭ سوعىس جانە ەڭبەك ارداگەرى بار. «حالىق قاھارمانى» جانە قازاقستاننىڭ ەڭبەك ەرى اتاعىن يەلەنگەن 17 ارداگەر، 2 كەڭەس وداعىنىڭ باتىرى، 115 سوسياليستىك ەڭبەك ەرى ۇيىمنىڭ ماقتانىشتارى بولىپ سانالادى.

سالتاناتتى جينالىسقا ارداگەرلەر ۇيىمىنىڭ ورتالىق كەڭەسىنىڭ ءتوراعاسى ب. ىزمۇحامبەتوۆ، ەلىمىزدىڭ بارلىق ءوڭىرىنىڭ سوعىس جانە ەڭبەك ارداگەرلەرى، پارلامەنت ءماجىلىسىنىڭ دەپۋتاتتارى، مەملەكەتتىك ورگاندار، جۇرتشىلىق جانە بۇقارالىق اقپارات قۇرالدارى وكىلدەرى قاتىستى.

گۇلشارا ءابدىقالىقوۆا قۇتتىقتاۋ سوزىندە ارداگەرلەرگە قامقورلىق جاساۋ، ولاردىڭ تۇرمىس دەڭگەيىن ارتتىرۋ مەملەكەتتىڭ الەۋمەتتىك ساياساتىنىڭ باستى باسىمدىعىنىڭ ءبىرى بولىپ سانالاتىنىن اتاپ ءوتتى.

مەملەكەتتىك حاتشى 2017 جىلعى 1 شىلدەدەن باستاپ پرەزيدەنتتىڭ تاپسىرماسى بويىنشا زەينەتاقى 2016 جىلمەن سالىستىرعاندا 20%-عا وسەتىنىن ايتتى. بۇدان بولەك، نەگىزگى زەينەتاقىنى تاعايىنداۋ جاڭا ادىستەمە بويىنشا جۇزەگە اسىرىلىپ، ونىڭ مولشەرى زەينەتاقى جۇيەسىنە قاتىسۋ وتىلىنە بايلانىستى بولماق. بۇل شارالار 2018 جىلى نەگىزگى زەينەتاقى كولەمىن 2017 جىلمەن سالىستىرعاندا 1،8 ەسە ۇلعايتۋعا مۇمكىندىك بەرەدى.

مەملەكەتتىك حاتشى رەسپۋبليكالىق بىرلەستىكتىڭ قازاقستان رەسپۋبليكاسىنىڭ قالىپتاسۋى مەن دامۋىنا قوسقان ۇلەسىن ايرىقشا اتاپ ءوتتى.

سوڭىندا مەملەكەتتىك حاتشى ەل پرەزيدەنتىنىڭ «بولاشاققا باعدار: رۋحاني جاڭعىرۋ» اتتى باعدارلامالىق ماقالاسىندا قويىلعان مىندەتتەردى ىسكە اسىرۋعا ارداگەرلەر بەلسەندى تۇردە اتسالىساتىنىنا سەنىم ءبىلدىردى.

سالتاناتتى جيىن بارىسىندا ارداگەرلەر نۇرسۇلتان نازاربايەۆتىڭ ۇدايى كورسەتىپ كەلە جاتقان قامقورلىعى ءۇشىن العىس ءبىلدىردى. ولار قازاقستاندا سالتانات قۇرىپ وتىرعان بەيبىتشىلىك، بىرلىك جانە كەلىسىمگە جەتكىزگەن مەملەكەت باسشىسىنىڭ كورەگەن ءارى سىندارلى ساياساتىن ءبىراۋىزدان قولدايتىنىن ايتتى.

شولۋشى: گۇلىم جاقان