ەر ادام مۇگەدەك ادامدى باۋىزداپ، اياۋسىز پىشاقتاپ تاستاعان، - دەپ حابارلايدى قامشى اقپاراتتىق اگەنتتىگى Tengrinews.kz باسىلىمىنا سىلتەمە جاساپ. 

اۋىر قىلمىستى جاسادى دەگەن كۇدىك مۇگەدەكتىڭ 30 جاستاعى كورشىسىنە كەلىپ وتىر. ول بۇعان دەيىن بۇزاقىلىق وي-نيەتپەن دەنساۋلىققا ادام ومىرىنە ءقاۋىپ توندىرەتىن اۋىر زيان كەلتىردى دەگەن قىلمىسپەن سوتتالعان. الايدا ەر ادام مەرزىمىنەن بۇرىن شارتتى تۇردە بوستاندىققا شىققان.

"ال وسى جولى تاعىلىپ وتىرعان ايىپتارعا قاراعاندا، كۇدىكتى باستاپقىدا مۇگەدەكتى ەمەس، ونىڭ اعاسىن ءولتىرۋدى ويلاعان. ءبىراق ۇيدە اعاسى بولماي قالىپ، قاسكوي مۇگەدەكتەن اعاسىنىڭ قايدا ەكەنىن سۇراستىرا باستاعان. وسىدان كەيىن كوڭىلىندەگى ويلارىن جەتكىزگەن. اعاسىنا جاقتىرتپاۋشىلىق وي-نيەتى بار ەكەنىن جانە ولتىرگىسى كەلەتىنىن ايتقان. بۇعان مۇگەدەك كەلىسپەي، اعاسىنا تيىسپەي، ورنىنا ءوزىن ولتىرە سالۋدى سۇراعان. وسى كەزدە قاسكوي بەلىنە جاسىرىپ الىپ كەلگەن اسحانا پىشاعىن شىعارىپ، ەكى اياعى جوق ادامدى باۋىزداپ، كەيىن پىشاقتاعان. العان جاراقاتىنان مۇمكىندىگى شەكتەۋلى جان وقيعا ورنىندا قازا تاپقان. كۇدىكتى پىشاقتى وزىمەن بىرگە الىپ كەتكەن"، - دەلىنگەن قىلمىستىق ءىستىڭ ماتەريالدارىندا. 

تەرگەۋ ورگاندارىنىڭ مالىمەتىنشە، سوتتالۋشىعا قاتىستى سوتقا دەيىنگى شارالار ءجۇرىپ جاتىر. ءىس ماتەريالدارى قاراعاندى وبلىستىق قىلمىستىق ىستەر جونىندەگى اۋدانارالىق مامانداندىرىلعان سوتىنا كەلىپ تۇسكەن. باس سوت وتىرىسىنىڭ قاشان وتەتىنى ازىرشە بەلگىسىز.