باۋىرجان بايبەك اكىمدەر رەيتينگىندە كوش باستادى دەپ حابارلايدى قامشى اقپاراتتىق اگەنتتىگى sayasat.org پورتالىنا سىلتەمە جاساپ.

اكىمدەر رەيتينگىسىن انىقتاعان ساۋالناما 2017 جىلدىڭ 1 مامىرىنان 7 مامىرىنا دەيىن وتكىزىلگەن. وعان 26 ساراپشى، بلوگەر، ساياساتتانۋشى، پوليتتەحنولوگ، قوعام قايراتكەرلەر قاتىسقان.  

ءساۋىر ايىنىڭ رەيتينگىندە الماتى اكىمى باۋىرجان بايبەك كوش باستاپ تۇر. ساۋىردە ەڭ جاس اكىم قالا قۇرىلىسى، جول جوندەۋ، ينجەنەرلىك كوممۋنيكاسيا ماسەلەلەرىمەن بەلسەنە اينالىسقان. سونداي-اق،ول بولات قۇبىرلار زاۋىتىن اشتى.

 ساراپشىلاردىڭ پىكىرىنشە، باۋىرجان بايبەك سىن ساداعىنا كوبىرەك ىلىنگەن. ول ينۆەستورلار كۇنىن وتكىزىپ، سينگاپۋر مەن جاپونيادان دەلەگاسيا قابىلداعان. ەۋروپا قايتا قۇرۋ جانە دامۋ بانكىنىڭ باسشىلىعىمەن كەزدەستى.

ەكىنشى ورىنعا قىزىلوردا وبلىسىنىڭ اكىمى قىرىمبەك كوشەربايەۆ  تابان تىرەدى. كورشىلەس وبلىستاردى سۋ الىپ جاتقانىنا بايلانىستى ق.كوشەربايەۆ سۋ رەسۋرستارى كوميتەتى باسشىسى يسلام ابىشيەۆپەن بىرلەسە وتىرىپ، ءبىرىنشى كەزەكتە ءقاۋىپ توندىرەتىن ايماقتاردى باقىلاۋعا الدى. اۋەدەن باقىلاۋ جۇمىستارىنىڭ ناتيجەسىندە ۇكىمەتتە كونتررەگۋلياتور سالۋ ماسەلەسى كوتەرىلدى. سونداي-اق، قىزىلوردا وبلىسىنىڭ اكىمى «مايكروسوفت» كومپانياسىمەن كەلىسىمگە قول جەتكىزدى. ەندى وبلىس ستۋدەنتتەرى ازۋلى كومپانيادا ءبىلىم الاتىن بولدى.

اكىمدەردىڭ رەيتينگىندە استانا اكىمى اسەت يسەكەشوۆ ۇشتىككە ءىلىندى. رەسپوندەنتتەر اسەت ورەنتاي ۇلىنىڭ مانسابى ەندىگى كەزەكتە ەكسپو-نىڭ قالاي وتەتىندىگىمەن تىكەلەي بايلانىستى ەكەندىگىن ايتتى. استانا اكىمى كۇزگە دەيىن تىعىز رەجىمدە جۇمىس جاسايتىن بولادى.

 ءتورتىنشى ورىنعا توقتاعان اقتوبە وبلىسىنىڭ اكىمى بەردىبەك ساپاربايەۆتىڭ ساۋىردەگى ەڭ باستى ارەكەتىن ايتساق، ول ورىنبور وبلىسىنا اقتوبەنىڭ ينۆەستيسيالىق مۇمكىندىگىن تانىستىرىپ كەلدى. سونداي-اق، اكىم «قاراشىعاناق  پەتروليۋم وپەرەيتينگ» كومپانياسى مەن قازاقستاندىق سەرۆيستىك كومپانيالاردىڭ اراسىنداعى ارىپتەستىكتى نىعايتۋ ءۇشىن كەلىسسوزدەر جۇرگىزدى. ايتا كەتۋ كەرەك، كوكتەمدە بولعان سۋ تاسقىنى ساپاربايەۆتىڭ دا مانسابىن شايقاعانى بەلگىلى. وبلىس اكىمى قالىپتاسقان جاعىمسىز كوزقاراستى ازىق-تۇلىك پەن دارى-دارمەكتىڭ باعاسىن ارزانداتۋ ارقىلى جۇمسارتۋعا تىرىستى. بەردىبەك ماشبەك ۇلى ءۇي-جايلارىن سۋ العان تۇرعىندارمەن كەزدەسىپ، مۇڭ-مۇقتاجىن تىڭداعان جالعىز اكىم بولدى. 5ء-شى ورىندى مىسە تۇتقان الماتى وبلىسىنىڭ اكىمى اماندىق باتالوۆ پرەمەر-مينيسترگە ەلباسىنىڭ تاپسىرمالارىن ورىنداۋ بويىنشا ەسەپ بەرگەنى بەلگىلى. پرەمەردىڭ تىعىز جۇمىس كەستەسى كورسەتكەندەي، جەرگىلىكتى باسشىلىقتىڭ ايتارى مول بولعانعا ۇقسايدى.

سونداي-اق، تالدىقورعان  تۇرعىندارى العاش گازعا قوسىلدى. ا.باتالوۆ اقسۋ قانت زاۋىتىنىڭ قۇرىلىسىنان باستاپ مامانداردى ورنالاستىرۋ ماسەلەسىنە دەيىن ءوزى قاداعالاپ وتىر. اتالعان ايماقتا مەملەكەتتىك-جەكەشەلىك ارىپتەستىك اياسىندا 11 جوبا جۇزەگە اسىپ كەلەدى.  التىنشى ورىنعا تۇراقتاعان شىعىس قازاقستان وبلىسىنىڭ اكىمى دانيال احمەتوۆ كوپشىلىككە سەمەيدى كوتەرۋ تۋرالى ۋادە بەرگەن ەدى. وبلىس ورتالىعىنىڭ كوپ پروبلەمالارى شەشىلە باستاعانىن ايتا كەتۋ كەرەك. رەسپوندەنتتەر قوعامدىق كولىكتەگى جول ءجۇرۋ باعاسىنا بايلانىستى داۋ-جانجالدى دا ەسكەرىپ ءوتتى. د.احمەتوۆ جول اقىسىن تەك اۆتوبۋس پاركتەرىن مونوپوليادان شىعارىپ جولداردى جوندەگەن سوڭ عانا كوتەرۋگە بولاتىنىن ايتقان بولاتىن. ساۋىردە د.احمەتوۆ اۋرۋحانالاردى جابدىقتاۋ، تۋريستىك يندۋستريانى دامىتۋ، ءسۇتتى مال شارۋاشىلىعىن دامىتۋ ماسەلەلەرىمەن اينالىستى.

8 ورىنعا تابان تىرەگەن وقو اكىمى جانسەيىت تۇيمەبايەۆ مەملەكەت باسشىسىمەن كەزدەسكەن بولاتىن. كەزدەسۋ بارىسىندا ەلباسى ايماقتاعى نەگىزگى پروبلەمالاردى باسا كورسەتتى.

 وقو وڭتۇستىكتەگى ىسكەرلىك كليماتتى قالىپتاستىرۋ بويىنشا ۇزدىك ۇشتىكتە ەكەن. ايماقتىڭ نەگىزگى الەۋمەتتىك-ەكونوميكالىق كورسەتكىشتەرى وڭ ديناميكانى كورسەتىپ وتىر. ماڭعىستاۋ وبلىسىنىڭ اكىمى ەرالى توعجانوۆ 10 ورىنعا لايىق دەپ تانىلدى. مەملەكەت باسشىسىنىڭ وبلىسقا ساپارى ءساتتى ءوتتى. رەيتينگتىڭ وزگە دە جاڭا قاتىسۋشىلارى سولتۇستىك قازاقستان، قاراعاندى، اقمولا وبلىستارىنىڭ باسشىلارى مالىك مىرزالين (10-ورىن)، قۇمار اقساقالوۆ (13-ورىن)، ەرمەك قوشانوۆ (15-ورىن) قىزمەتتەرىنىڭ العاشقى ايىندا  ۇلكەن سىنعا تاپ بولدى. وبلىس اكىمدەرى سۋ تاسقىنىنان زارداپ شەككەن تۇرعىنداردىڭ ماسەلەسىن شەشۋمەن اينالىستى. ساراپشىلار ايتقانداي، تاسقىن سۋ ولارعا الدىڭعى اكىمدەردەن مۇراعا قالعان پروبلەما. الايدا، ەندى ولار شيراپ جاقسى كريزيس-مەنەدجەرلەرگە اينالادى. قوستاناي وبلىسىنىڭ اكىمى ارحيمەد مۇحامبەتوۆ (16-ورىن) كوكتەمگى سۋ تاسقىنىمەن شاما-شارقى جەتكەنشە كۇرەستى. ەندىگى كەزەكتە وعان تاسقىن زاردابىن جويۋ ارقىلى ۇپاي جيناۋ كەرەك. 

شولۋشى: نازەركە مۇسا