جۇڭگو جىبەك جولى قورىنا (ججق) قوسىمشا 100 ملرد. يۋان (15 ملرد-قا جۋىق دوللار) باعىتتايدى. بۇل تۋرالى «ءبىر بەلدەۋ، ءبىر جول» ستراتەگياسى شەڭبەرىندە حالىقارالىق ىنتىماقتاستىق بويىنشا جوعارى دەڭگەيدەگى  فورۋمنىڭ اشىلۋىندا قحر ءتوراعاسى سي سزينپين مالىمدەدى، دەپ حابارلايدى قازاقپارات.

«جۇڭگو   باستامانى جۇزەگە اسىرۋ ءۇشىن (ءبىر بەلدەۋ، ءبىر جول) جىبەك جولى قورىنا قوسىمشا 100 ملرد. يۋان قۇيادى. ءبىز قارجى ينستيتۋتتارىن 300 ملرد. يۋان شاماسىندا باعالانعان وپەراسيالاردى يۋانمەن جۇرگىزۋگە شاقىرامىز. قىتايلىق دامۋ بانكى جانە جۇڭگو ەكسيم-بانكى سايكەسىنشە 200 ملرد. يۋان جانە 130 ملر.د يۋان مولشەرىندە  ينفراقۇرىلىمداردى، ونەركاسىپ قۋاتىن جانە قارجىلاندىرۋدى قولداۋدىڭ  ارنايى كرەديتتەۋ سحەماسىن قۇرادى»، – دەدى ول.

ەسكە سالا كەتسەك، جۇڭگو جىبەك جولى قورىنا (ججق) 2014 جىلعى جەلتوقساندا «ءبىر بەلدەۋ، ءبىر جول» ستراتەگياسى شەڭبەرىندە جۇزەگە اسىرىلاتىن ينفراقۇرىلىمدىق جوبالاردى قارجىلاي قامتاماسىز ەتۋ ماقساتىندا قۇرىلعان. وسى ۋاقىتقا دەيىن ونى كاپيتالداندىرۋ سوماسى 40 ملرد. دوللاردى قۇرادى.

فورۋمعا 29 مەملەكەت، 3 حالىقارالىق ۇيىم  (بۇۇ، دۇنيەجۇزىلىك بانك، حالىقارالىق ۆاليۋتا قورى) باسشىلارىمەن بىرگە قازاقستان پرەزيدەنتى نۇرسۇلتان نازاربايەۆ قاتىسۋدا.

فورۋمنىڭ باستى ماقساتى – ىنتىماقتاستىقتى جانداندىرۋ باعىتتارىن تالقىلاۋ، ءوزارا ءىس-قيمىل پلاتفورمالارىن قالىپتاستىرۋ جانە ىنتىماقتاستىق ناتيجەلەرى بويىنشا تاجىريبە الماسۋ.

ءىس-شارادا ينفراقۇرىلىمدىق بايلانىس، ساۋدا-ەكونوميكالىق ىنتىماقتاستىق، ونەركاسىپتىك ينۆەستيسيالار، ەنەرگەتيكا مەن رەسۋرستار، قارجىلىق قولداۋ، قورشاعان ورتانى قورعاۋ سياقتى ماڭىزدى ماسەلەلەر تالقىلانۋدا.