14 مامىردا الەۋمەتتىك جەلىدە جاريالانعان تومەندەگى جازبا قاتتى تالقىلاندى. 200 شاماسىنداعى ادام بولىسكەن جازبا ماڭعىستاۋ وبلىستىق دەنساۋلىق ساقتاۋ باسقارماسى باسشىسى قىزمەتىن اتقارعان مارال قادىر تۋرالى. ول اتالعان قىزمەتكە 2016 جىلدىڭ تامىز ايىندا تاعايىندالعان بولاتىن. ونىڭ الدىندا ۇزاق جىلدار وبلىستىڭ باس سانيتارى قىزمەتىن اتقارعان. مارال قادىردى 5 مامىردا اقتاۋ قالالىق سوتى 7 جىلعا باس بوستاندىعىنان ايىردى.
***
فەميدانىڭ كوزىنە اق ءتۇستى! اقتاۋ قالالىق سوتىنىڭ سۋدياسى م.كەنجالييەۆ وبلىستىق دەنساۋلىق ساقتاۋ باسقارماسىنىڭ ەكس-باسشىسى مارال ءقادىردى 7 جىل باس بوستاندىعىنان ايىرۋعا ۇكىم شىعاردى. 7 جىل! جەتىم قىز، جەسىر ايەل، جالعىزباستى اناعا جەتى جىل!!!
ال، "استانا-ەكسپو" ۇلتتىق كومپانياسىنىڭ 214 ملن قارجىسىن جىمقىردى دەپ ايىپتالعان (ەركەتوتاي بالاسىنىڭ كىسى ولتىرگەن قىلمىسىن قوسپاعاندا) ق. ۇسەنوۆ راقىمشىلىقپەن بوساپ شىقتى. بۇنى ءبىر دەپ ءبىلىڭىز. حورگوس باسشىسى ۆ.ني 1 ملن دوللار پارامەن ۇستالىپ، كوزاپارا قۇتىلىپ كەتتى. بۇل ەكى. 4 000 000 تەڭگە پارا سۇراپ تۇتىلعان احمەتالييەۆا دا قالالىق سوتتان 12 جىلعا كەسىلىپ تۇرىپ، وبلىستىق سوتتىڭ شەشىمىمەن 5 جىلعا جەڭىلدەتىپ الدى. جەمقورلىقپەن 1جىل 6 ايعا سوتتالعان قۇلماعامبەتوۆ 2000 ەاك ايىپپۇلعا وزگەرتىپ قۇتىلدى. اقشا بوپسالاعان دەربىسوۆا 3 جىل مەرزىمىن شارتتى جازاعا اۋدارىپ الدى. 1000 000 تەڭگە بوپسالاعان دەمەسىنوۆا مەن تۇلەكبايەۆا ءىسى دە جەڭىل جازامەن اياقتالعان. ال، بار -جوعى 45 000 تەڭگەلىك (300 دوللار) مارال قادىرگە كەلگەندە مارتەبەلى سوت زاڭقوي ءام قاتال! 7 جىل!
ءومىر بويى مەمقىزمەتكە تيىم! مۇلىگىن كامپەسكەلەۋ! قايداسىڭ، سوقىر فەميدا؟! وسى اپتادا وسى ءىستىڭ ۇكىمشىسى م.كەنجالييەۆ ارنايى بريفينگ بەردى. سوتتىڭ اشىق وتكەنىن، مارالدىڭ جاقتاستارى ۆيدەودالەلدەردى كورىپ، ءۇنسىز عانا كەلىسكەندىگىن ايتتى. جوق! ولاي ەمەس. شاعىن سوت زالىنا سىيماي قالعان حالىق، سوت ۇكىمىن وقىعاندا كۇڭىرەنىپ كەتكەن كوپشىلىك، تالىقسىپ قۇلاعان انا، قۇلىن داۋىسى شىرقىراعان بالا... ولار سوت شەشىمىمەن ەش كەلىسكەن جوق بولاتىن. ورتالىقتان كەلگەن پسيحو-فيلولوگيالىق ساراپتاما مارالدىڭ قىلمىسقا قاتىسىن دالەلدەۋ مۇمكىن ەمەس دەپ شىققان. ول ەسەپكە الىنعان جوق! ۇستاۋ كەزىندە مارالدىڭ اقشا سالىنعان كونۆەرتتى ءوز قولىمەن ايقايلاپ، جەكىرىپ، قورقىتىپ سومكەسىنە سالدىرتىپ، سوسىن كامەرانى قوسقاندىعى تۋرالى دەرەگى ەسەپكە الىنعان جوق! ءبىرىنشى كۋاگەر بەرگەن 100 مىڭ تەڭگەنىڭ ارىپتەستىڭ قايتقان اناسىنىڭ جانازاسىنا ۇجىمنىڭ جيناعان قارجىسى ەكەندىگىن ارىپتەستەرىنىڭ ءوزى ايتىپ تا، جازىپ تا بەرسە دە ەسەپكە الىنعان جوق! ەكى كۋاگەردىڭ دە مارال تاراپىنان كورگەن قىسىمى وزدەرىنىڭ كاسىبي بىلىكتىلىگىنە قاتىستى قىزمەتتىك تالاپ ەكەندىگى قانشاما جۇمىستىق حاتتامالارمەن دالەلدەنسە دە ەسەپكە الىنعان جوق! سوت وتىرىستارىندا بەينەدالەلدەردىڭ مونتاجدالىپ، وزىنە قارسى پايدالانىلعاندىعىن، ءوزىن اقتاپ الاتىن دالەلدى تۇستارىنىڭ قيىلعانىن ايتسا دا ەسەپكە الىنعان جوق! جالعىز ۇلى جان دوسىن سۋدان قۇتقارام دەپ ءوزى دە تەڭىزگە باتىپ ولگەن ازالى انا ەكەندىگى ەسەپكە الىنعان جوق! سول وقيعادان پسيحولوگيالىق زاقىم العان جالعىز قىزدىڭ قاراۋسىز، پاناسىز، اناسىز قالعاندىعى ەسەپكە الىنعان جوق! جالعىزباستى انا ەكەندىگى ەسەپكە الىنعان جوق! بۇل قىزمەتكە بۇرىنعى وبلىس اكىمى 8 اي كوندىرىپ اكەلگەن بىلىكتى تاجىريبەلى مامان ەكەندىگى ەسەپكە الىنعان جوق! بۇعان دەيىنگى باسشىلار اۋزىنان اق ماي اقتارىلىپ، پالەنباي ءۇي، قىمبات كولىكپەن كوشە الماي قالعانىندا ۇستىنە قىلتاناق ىلمەي، ءۇش بولمەلى ۇيدە قاناعاتپەن ءومىر ءسۇرىپ، 5 ايعا جەتپەيتىن قىزمەت ىشىندە جەمقور بولىپ كەتۋگە ارى دا، ۋاقىتى دا جەتپەيتىندىگى ەسەپكە الىنعان جوق! مەمايىپتاۋشى پروكۋراتۋرا 12 ملن تەڭگە ايىپپۇل جازاسىن سۇراسا دا ەسەپكە الىنعان جوق! اراشا سۇراعان ەل-جۇرت، اقساقالدار، ەل اعالارى، ۇجىم- ارىپتەستەرى ءبارى-بارى ەسەپكە الىنعان جوق! سەن سوقىر عانا ەمەس، تاسجۇرەك ەكەنسىڭ عوي، فەميدا!..
P.S: مارال ءقادىردىڭ وبلىستىق سوتقا اپەللياسيالىق شاعىم تۇسىرۋىنە از عانا ۋاقىتى قالدى. ادۆوكاتتارى قامسىز ەمەس بولار. ايتسە دە، "اكەمدى العان اجالدان مەن دە قورقام" دەگەن ەكەن بىرەۋ. قورقامىز جانە ۇمىتتەنەمىز...تىلەيمىز! جالپى مارالدىڭ قىسقا عانا باسشىلىق قىزمەتىندە كىمدەردىڭ "اياعىن باسىپ" كەتكەنى، كىمدەردىڭ مايشەلپەك ومىردەن ايرىلعىسى كەلمەگەنىن ءقازىر سەزبەسەك تە كەيىن سەزەتىن بولامىز. پارا الۋشى بار دا بەرۋشى جازاسىز شىتىرمان ءىستىڭ دە كۋاگەرلەرى جاپقان جالالارىن ءوز ارىنىڭ تارازىسىنا تارتا تۇرسىن. مىنا ىرىپ-شىرىگەن قوعام ولارعا دا ءبىر جالاقوردى جولىقتىرار. نيەتتەرىنەن تاپسىن دەيمىز بە، الدە... ءجا، ازىرگە ەشكىمدى قارعامايىق، قارالامايىق. قاتال ۇكىم كەسۋشى سۋديانى دا. ول دا زاڭعا سۇيەنگەن بولار. ءبىراق!.. تەك، مارتەبەلى زاڭنىڭ ادام يگىلىگى ءۇشىن جاسالاتىندىعىن، ءبارىمىزدىڭ دە ادام بولىپ قالۋىمىزدى شىن تىلەيىكشى...
پىكىر قالدىرۋ