«كوك جايلاۋدا قۇرىلىس باستالىپ كەتتى. دوستار، تابيعاتى تاماشا مەكەندى قورعايىق! جەرىمىزدى، تالىمىزدى، ورمانىمىزدى ۇرپاعىمىز ءۇشىن ساقتايىق! ىسكە كوشەيىك!»

ءدال وسىنداي مازمۇنداعى ۇندەۋ الەۋمەتتىك جەلىدە تارالىپ كەتتى. تارالۋىنا سەبەپ تە كوپ. الماتى دەگەندە كەز-كەلگەن ادامنىڭ كوز الدىنا بىرىنشىدەن ىلە-الاتاۋى ەسكە تۇسەدى ەمەس پە؟ قالىڭ ورمان، جاسىل القاپ، جايقالعان گۇل، ەڭ باستىسى ءيىسى مۇرىن جاراتىن المالار مەن اپورتتار. ءيا، الماتىلىقتاردىڭ، ءتىپتى قازاقستاندىقتاردىڭ ماقتانۋعا تۇرارلىق ەڭ عاجاپ جەرلەرىنىڭ ءبىرى الماتىنىڭ الىپ تاۋلارى. جەرىمىزدىڭ كوركەم مەكەنىن ءبارى كورسىن دەگەن نيەتپەن 1996 جىلى 22 اقپاندا ق ر ۇكىمەتى قاۋلىسىمەن ىلە-الاتاۋىنىڭ مەملەكەتتىك ۇلتتىق تابيعي پاركى قۇرىلعان. اتالمىش پارك ورتالىق ازياداعى ەرەكشە قورعالۋى ءتيىس تابيعي ايماقتاردىڭ ىشىندەگى ەڭ ءىرىسى. قورعالۋى ءتيىس ەدى، ءبىراق جەرىنە كوز سۇققانداردىڭ قاراسى كوبەيىپتى. 

فەيسبۋك قولدانۋشىسى سالتانات ءتاشىموۆا پاراقشاسىنا تاۋ باسىندا ورنالاسقان كوك جايلاۋدىڭ مۇشكىل ءحالى جايىندا ۆيدەو سالعان ەكەن.    

«ىلە-الاتاۋى ۇلتتىق ساياباعىنىڭ جەرىندە قۇرىلىس جۇمىستارى باستالدى. بۇل قۇرىلىس تۇبەگەيلى زاڭعا قايشى ەكەنىن ايتا كەتكەن ءجون. ق ر قىلمىستىق كودەكسىنىڭ بابىنا سايكەس ءىس قوزعالۋى ءتيىس. جالپى، قۇرىلىسشىلار قىزىل كىتاپقا ەنگەن 467 سيۆەرس الما اعاشىن جويدى، 22000 تيان-شان شىرشالارىن شاۋىپ تاستادى. ەلدى مەكەندە سيرەك وسەتىن وسىمدىكتەردىڭ كوزى جويىلدى. حالىق بۇل قۇرىلىستىڭ تۇبىندە جەمقورلىق جاتقانىن ايتىپ شۋلاسۋدا. قۇرىلىستىڭ باسى قاسىندا سالىق تولەۋشىلەر جۇرگەن كورىنەدى»، دەلىنگەن فەيسبۋك قولدانۋشىسىنىڭ جازباسىندا.

قامشى اقپاراتتىق اگەنتتىگىنىڭ ءتىلشىسى بۇل ۇندەۋدى تولىعىمەن قولداپ، كورەرمەن نازارىنا ۇسىنادى. تابيعاتتىڭ اسەمدىگىن قورعاۋ، تازا اۋاسىن ساقتاۋ 10 شاقتى ادامنىڭ قولىنان كەلە قويماس، ۇندەۋ بارشا قازاقستاندىقتارعا ارنالادى. ءار ازامات ءوز ەلىنە تيەسىلى جەردىڭ ءار بۇرىشى ءۇشىن جاۋاپتى بولۋى ءتيىس. ءوزى ءۇشىن دە، وسكەلەڭ ۇرپاق ءۇشىن دە...  

شولۋشى: گۇلىم جاقان