بۇل جايىنا زاتوبولسك ايماعىنىڭ تۇرعىندارى حابار بەرگەن، دەپ حابارلايدى قامشى اقپاراتتىق اگەنتتىگى kstnews.kz باسىلىمىنا سىلتەمە جاساپ.
سونىمەن قاتار بۇل عيمارات تا ءتىس ەمدەۋ اۋرۋحاناسى دا بولعان ەكەن. «ال ءمايىتتىڭ ۋى نە بولماق، ول جىلدار بويى ساقتالىپ تۇرا بەرەدى ەمەس پە؟! بۇل نارسە دەنساۋلىققا وتە زياندى»، - دەپ ينتەرنەت قولدانۋشىلارى ءوز شاعىمدارىن ءبىلدىردى. اتالمىش ماسەلەگە قاتىستى ءمان-جايدىڭ انىق-قانىعىن ءبىلۋ ماقساتىندا جەرگىلىكتى تۇرعىندار سول ۇيگە بارىپ كورگەن.
«بۇل جەرگە الدىمەن اپكەم كەلىپ قونىستانعان، ول ءقازىر باسقا عيماراتتا تۇرادى. ول جەردىڭ جاعدايى جاقسىراق. ال ءبىزدىڭ تۇرمىسىمىز تىم ناشار، ومىرىمىزدە ءبىراز قيىنشىلىقتار بولدى. كەيىننەن اپكەم بۇل عيماراتتىڭ قوجايىنىمەن كەلىسىپ، وسى جەردە تۇرۋىمىزعا رۇقسات الىپ بەردى. جارىق پەن گازعا عانا تولەيمىز، باسقاسىنا كوپ شىعىن شىعارۋدىڭ قاجەتى جوق»، - دەيدى مورگ عيماراتىن پانالاپ وتىرعان راۋشان قۇجامقۇلوۆا.
بۇل وتباسىندا ءۇش بالا بار. ءۇي الۋعا كەزەكتەرىن كۇتىپ جۇرگەندەرىنە بىرنەشە جىل بولعان ەكەن. تۇرمىسى تومەن وتباسى كەزەكتەرى كەلگەنشە شامالارى كەلگەن جەردە تۇرۋعا ءماجبۇر.
«بۇل جەردە ۇزاق بوگەلمەيمىز، زارەچنىي اۋدانىنا قاراي كوشۋدى جوسپارلاپ وتىرمىز. بۇل جەردىڭ ءبىر جاقسىسى – مەكتەپ تىم الىس ەمەس، بالالارعا ىڭعايلى»، - دەيدى ءۇش بالانىڭ اتا-اناسى. «ماتەريالدىق كومەك قاجەت پە؟» دەگەن سۇراققا «ءوزىمىزدىڭ دە قولىمىزدان كەلەدى» دەپ جاۋاپ قاتقان.
- بۇل جەردە كوپتەگەن ادامداردىڭ مايىتتەرى جاتقان، مۇنداي عيماراتتا كۇنەلتۋگە قورىقپايسىزدار ما؟
- كەيدە قورقىنىشتى... الايدا، بۇل جەردە مورگ بىرنەشە جىل بۇرىن بولعان. كەيىننەن ءتىس ەمدەۋ اۋرۋحاناسىنا اينالعان. سول كەزدە تازارتۋ جۇمىستارىن جۇرگىزگەن بولار. بۇل جەردى، ءتىپتى، مورگ بولعان جەر دەپ ايتا المايسىڭ، ول جايىندا دا كوپ ويلاي بەرمەيمىز.
مورگ عيماراتىندا كۇنەلتۋگە بولادى ما؟ – دەگەن سۇراق توڭىرەگىندە كەڭەس الۋعا تىرىستىق.
«مۇنداي جاعدايعا تىيىم سالۋ قاجەتتىگى جونىندە ەشقانداي دا زاڭ جوق. سول سەبەپتى دە تۇرا بەرۋگە بولادى»، - دەپ مالىمدەدى اسا ءقاۋىپتى ينفەكسيالار مەن كارانتيندەردى باقىلاۋ ورتالىعىنىڭ باسشىسى ليۋدميلا نالوبينا.
اۋدارعان: نازەركە لابيحان
