الماتىدا وگەي شەشەسىمەن ونىڭ بالارىنىڭ قولىنان مەرت بولعان 11 جاستاعى وركەن ازامات ۇلىنىڭ اجەسى وتباسىلىق جاعدايى تۋرالى ايتىپ بەردى، دەپ حابارلايدى قامشى اقپاراتتىق اگەنتتىگى قازاقپاراتقا سىلتەمە جاساپ.

وركەننىڭ اجەسى مارقۇم نەمەرەسىنىڭ وگەي شەشەسىن سىيلاعانىن ايتتى.

«وركەننىڭ اناسىمەن اجىراسقاننان كەيىن ۇلىم شاريپامەن تانىستى. مەن ونىڭ ەرەسەك بالالارى بار ەكەنىن بىلگەم جوق. سويتسەم، ول الداپ كەلگەن ەكەن. 17 جاستاعى قىزىن ءسىڭىلىم دەپ تانىستىرعان. ۇلكەن بالاسى تۋرالى ەستىگەم دە جوق. بارلىعى كەيىن بەلگىلى بولدى عوي. ۇلىم مەن كەلىن باقىتتى بولدى دەپ ايتا المايمىن. ولار ءجيى رەنجىسەدى. ونىڭ اتى شاريپا ەمەس، بىردە ايدا، بىردە شاريپا بولادى. وركەن ونى «ماما» دەيتىن. ول كەلگەن سايىن، «ماما كەلدى» دەپ ايتاتىن»،- دەدى وركەننىڭ اجەسى باعداگۇل ەسەنبەكوۆا.

سوتتا وركەننىڭ اجەسى سوتتالۋشىلار تەمىر مەن قادىرجاننىڭ نەمەرەسىن اڭدىپ جۇرگەنىن كورگەن. ءبىراق، بۇلاي بولادى دەپ ويلاماعانىن ايتتى.

«بۇلاردىڭ ءجۇرىسى ماعان ۇناماپ ەدى»،- دەيدى ول.

ەسكە سالا كەتەيىك، بۇگىن قاسكەلەڭدە 11 جاستاعى وركەن ازاماتتىڭ ولىمىنە قاتىستى قوزعالعان قىلمىستىق ءىس بويىنشا باستى سوت تالقىلاۋى باستالدى.

سوتتا ايىپتالۋشى رەتىندە مارقۇم بالانىڭ وگەي شەشەسى شاريپا اقبەردييەۆا مەن ونىڭ تەمىر، ايدانا ەسىمدى بالالارى بار. سونىمەن قاتار، تەمىردىڭ اعايىنى كامەلەت جاسقا تولماعان قادىرجان گۋلياموۆ، تاكسيست رۋسلان مۋتالييەۆ تە ايىپتالۋشى رەتىندە سوتقا تارتىلىپ وتىر.

شاريپا اقبەردييەۆا مەن تەمير اقبەردييەۆ ق ر قك-نىڭ 99-بابى، 2-بولىگى، 3،7،14 تارماقتارى (ۇيىمداسقان تۇردە كىسى ءولتىرۋ) جانە 132-باپ (كامەلەتكە تولماعاندى قىلمىستىق ىسكە تارتۋ) بويىنشا ايىپتالىپ وتىر. قادىرجان گۋلياموۆ 99-باپتىڭ 2-بولىگى 3،7،14 تارماقتارى بويىنشا جانە 125-باپتىڭ 2-بولىگى، 1،5 (ۇيىمداسقان تۇردە ادام ۇرلاۋ) تارماقتارى بويىنشا، ال ايدانا اقبەردييەۆا مەن رۋسلان مۋتالييەۆكە اتالعان قىلمىستاردىڭ جاسالۋىنا كومەك كورسەتكەنى ءۇشىن 99-باپتىڭ 2-بولىگى، 3، 7، 14-تارماقتارى جانە ق ر قك 125-بابىنىڭ 2-بولىگى، 1،5 تارماقتارى بويىنشا ءىس قوزعالعان.

بۇعان دەيىن حابارلانعانداي، وركەن ازامات ۇلى الماتىداعى مەكتەپتەردىڭ بىرىنەن 2017 جىلدىڭ 19 قاڭتارى كۇنى جوعالىپ كەتكەن. نەمەرەسىنىڭ جوعالعانى تۋرالى اجەسى پوليسياعا حابارلاسقان. وسىدان كەيىن، بالانىڭ مۇردەسى تابىلدى. ونىڭ ولىمىنە قاتىستى كۇدىكتى رەتىندە، بالانىڭ وگەي شەشەسى مەن ونىڭ سىبايلاستارى ۇستالدى. تەرگەۋ امالدارىنىڭ مالىمەتىنە سۇيەنسەك، قىلمىستىق ءىستى ۇيىمداستىرىپ، جاساعان شاريپا اقبەردييەۆا كۇيەۋى مەن ەنەسىنەن ءوش الۋ ءۇشىن وسىنداي قىلمىسقا بارعان.