«الاش» پارتياسىنىڭ 100 جىلدىعىنا وراي باياناۋىل اۋدانىنىڭ ازاماتتارى «ۇلىلارعا تاعزىم - ۇرپاققا امانات» دەپ اتالاتىن اتتى ەكسپەديسيا قۇرىپ، تاريحي ورىنداردى ارالاۋدى باستادى، دەپ جازادى قامشى اقپاراتتىق اگەنتتىگى. بۇل تۋرالى الەۋمەتتىك جەلىدە  نۇر وتاننىڭ باياناۋىل پاراقشاسى جازعان.

ەلباسى نۇرسۇلتان نازاربايەۆ ۇسىنعان «تۋعان جەر» باعدارلاماسى اياسىندا وبلىستىق ءماسليحات حاتشىسى ورال سارتايەۆتىڭ باستاماسىمەن جانە «نۇر وتان» پارتياسى اۋداندىق فيليالىنىڭ قولداۋىمەن قۇرىلعان ەكسپەديسيالىق توپتىڭ قۇرامىندا جەتى ادام بار. ولار وڭىردەگى كيەلى جەرلەردى، تاريحي ەسكەركىشتەردى جانە تانىمال تۇلعالاردى تۋدىرعان ەلدى مەكەندەردى اتپەن ارالاپ، اۋىل جاستارىمەن كەزدەسۋدە.

- اتتى ەكسپەديسيا 12-مامىر كۇنى جولعا شىقتى. ماقساتىمىز - شالعاي اۋىلدارداعى جاستارمەن كەزدەسىپ، جاس ۇرپاقتى ەلىن-جەرىن سۇيۋگە ۇگىتتەۋ، ولاردى ات سپورتىنا جانە ۇلتتىق ونەرگە باۋلۋ. الدىمەن ات باسىن لەكەر قاجى اتىنداعى اۋىلعا بۇرىپ، اۋىل تۇرعىندارىمەن جانە جاستارىمەن كەزدەستىك. ودان شىققان سوڭ جۇسىپبەك ايماۋىتوۆ جانە جۇمات شانين اۋىلدارىنا بارىپ، ۇلىلاردىڭ تۋعان جەرىنە تاعزىم جاسادىق. ايماۋىتوۆ اۋىلىندا كوكپاردان جارىس ۇيىمداستىرىلسا، كەيىنگى ەلدى مەكەندە اسىق اتۋ سايىسىن وتكىزدىك. سونىمەن قاتار، وسى اۋىلدارداعى كۇرەڭباي سىنشىنىڭ زيراتى، قابىلبەك، قازىرەت مەكەنىندەگى ۇلىلاردىڭ قورىمىنا، سونداي-اق، مايلىتونداردىڭ ەسكى زيراتىنا، نۇرعالي موللانىڭ مەدرەسەسى بولعان ورىنعا، ۇستا، زەرگەر، كەنشى، گەولوگ - قوسىم پىشەمبايەۆتىڭ ماڭگىلىك جاتقان جەرىنە بارىپ دۇعا وقىپ، قۇران باعىشتادىق، - دەيدى وبلىستىق ءماسليحاتتىڭ دەپۋتاتى ورال سارتايەۆ.

سالت اتتىلاردىڭ ەندىگى باعىتى – بۇقار جىراۋ، ءماشھۇر ءجۇسىپ كەسەنەلەرىنە توقتاپ، ۇلىلاردىڭ رۋحىنا دۇعا باعىشتاۋ. ودان كەيىن ات باسىن جاياۋ مۇسا، قانىش ساتبايەۆ جانە سۇلتانماحمۇت تورايعىروۆ اۋىلدارى مەن شاكەن ايمانوۆ دۇنيەگە كەلگەن ايمانبۇلاق جەرىنە بۇرۋ. جۇرگەن جەرلەرىندە ءارتۇرلى كەزدەسۋلەر، مادەني جانە سپورتتىق شارالار ۇيىمداستىرۋدى جوسپارلاپ قويعان. 

ايتا كەتەيىك، ساياحاتشىلاردىڭ قۇرامىندا وبلىستىق جانە اۋداندىق ءماسليحاتتىڭ دەپۋتاتتارى، ونەر جانە سپورت سالاسىنىڭ ماماندارى بار.