قازاقستاندىقتاردىڭ حالىقارالىق ءازىربايجان بانكىنە سالعان زەينەتاقى جيناقتارى قايتارىلاتىن بولادى دەپ حابارلايدى قامشى اقپاراتتىق اگەنتتىگى kaz.tengrinews.kz تاراتقان اقپاراتقا سۇيەنىپ.

مەملەكەت بانكتى قۇتقارىپ قالۋ تۋرالى شەشىم قابىلدادى. بۇل تۋرالى ءازىربايجاننىڭ ادۆوكاتتار القاسىنىڭ مۇشەسى اكرام گاسانوۆ مالىمدەگەن. ءازىربايجان ۇكىمەتى بانكتىڭ قارىزدارىن تولەپ بەرۋ تۋرالى شەشىمگە كەلدى. سوندىقتان قازىرگى ۋاقىتتا ساراپشىنىڭ ايتۋىنشا، بجزق-عا دا، حالىقارالىق بانككە قارجى سالعان باسقا كومپانيالارعا ەشقانداي ءقاۋىپ ءتونىپ تۇرعان جوق.

"مىندەتتەر قايتا قۇرىلىمدانعان سوڭ حالىقارالىق بانك تازا تابىسپەن جۇمىس ىستەيتىن بولادى. سوندىقتان ەندى بانكتە ەشقانداي پروبلەما بولمايدى. ولارعا الاڭداۋدىڭ قاجەتى جوق. قازاقستاندا نەگىزسىز شۋ شىعىپ كەتتى"، - دەدى ساراپشى اكرام گاسانوۆ. 

ەسكە سالا كەتەيىك، وسىعان دەيىن ساراپشى راحىم وشاقبيەۆ بجزق-نىڭ ينۆەستيسيالاۋىنا قاتىستى پىكىر بىلدىرگەن ەدى. ونىڭ ايتۋىنشا، بجزق اكتيۆتەرىنىڭ 71،3 ميلليارد تەڭگەسى ءازىربايجاننىڭ حالىقارالىق بانكىنە سالىنعان. "وسىلايشا، زەينەتاقى اكتيۆتەرىنىڭ ساقتالۋىنا قاتىستى ۇلكەن قاۋىپتەر پايدا بولۋى مۇمكىن"، - دەگەن ەدى ساراپشى.

ءبىرىڭعاي جيناقتاۋشى زەينەتاقى قورىنىڭ ءازىربايجان حالىقارالىق بانكىنە سالىنعان 71 ملرد تەڭگەسى ساقتاندىرىلماسا، ول جوعالىپ كەتۋى مۇمكىن ەكەنىنەن حالىق الاڭداۋلى. سەبەبى ءازىربايجان بانكى سىرتتان تارتىلعان ينۆەستيسيالار بويىنشا وتەماقى تولەۋدى مۇلدەم توقتاتقان. ءتىپتى بانكروتقا ۇشىراۋى دا ىقتيمال. مول اقشانىڭ بەي-بەرەكەت جۇمسالعانى تۋرالى العاشقى دابىلدى ەكونوميستەر قاقتى.