قاراعاندى قالاسىنىڭ وڭتۇستىك-شىعىسىندا Rubicon مەيرامحاناسىنىڭ ماڭىندا جاياۋ جۇرگىنشىلەرگە ارنالعان جولدا تاكسي جۇرگىزۋشىسى ەكى قىزدى قاعىپ كەتتى. زارداپ شەككەن قىزداردىڭ ءبىرى وبلىستىق مەديسينالىق ورتالىقتا بۇگىن تۇندە قايتىس بولدى، - دەپ حابارلايدى قامشى اقپاراتتىق اگەنتتىگى Tengrinews.kz باسىلىمىنا سىلتەمە جاساپ.
"1997 جىلعى قىز وبلىستىق مەديسينالىق ورتالىققا اۋىر حالدە ءتۇستى. ونىڭ باسسۇيەگى اشىق تۇردە جاراقات العان، باسسۇيەك ميى قاتتى زاقىمدالعان. تۇندە ول كوماعا ءتۇسىپ، ەسىن جيماستان قايتىس بولدى"، - دەپ حابارلادى وبلىستىق دەنساۋلىق ساقتاۋ باسقارماسى باسپا ءسوز قىزمەتىنىڭ وكىلى ايجان يسا.
زارداپ شەككەن ەكىنشى قىزعا قازىرگى ۋاقىتتا ەش ءقاۋىپ جوق. 19 جاستاعى قىز ماقاجانوۆ اتىنداعى كلينيكادا جاتىر، ونىڭ اياعى سىنعان.
وبلىستىق ءىىد مالىمەتىنشە، وقيعا 15 مامىردا كەشكى ساعات وندار شاماسىندا بولعان.
"جول-كولىك وقيعاسى دەرەگىنە قاتىستى ق ر قىلمىستىق كودەكسىنىڭ 345-بابى 3-بولىگى بويىنشا سوتقا دەيىنگى تەرگەۋ شارالارى جۇرگىزىلىپ جاتىر. BMW ماركالى كولىكتىڭ جۇرگىزۋشىسى تىزگىنگە يە بولا الماي، ەكى جولاۋشىنى قاعىپ كەتكەن. جۇرگىزۋشى ۋاقىتشا ۇستاۋ يزولياتورىنا قامالدى"، - دەيدى وبلىستىق ءىىد باسپا ءسوز قىزمەتىنىڭ وكىلى باقىتجان قۇدياروۆ.
وقيعا ورنىندا كۋاگەرلەر تۇسىرگەن سۋرەتتەر بويىنشا، جول-كولىك وقيعاسىنىڭ سالدارىنان اۆتوكولىك اۋدارىلىپ قالعان. قۇقىق قورعاۋ ورگاندارىنىڭ ماماندارى وقيعانىڭ ءمان-جايىن انىقتاپ جاتىر.
تاكسي پاركىنىڭ باسشىلىعى وقيعا بولعان ۋاقىتتا ءوز قىزمەتكەرلەرىنىڭ جۇمىس ۋاقىتىن اياقتاپ، ۇيىنە قايتىپ بارا جاتقانىن مالىمدەدى.
"ءبىز ءالى ونىمەن كورىسىپ، سويلەسكەن جوقپىز، سەبەبى وقيعا تۇنگى ۋاقىتتا بولعان. بۇل جاس جىگىت بىزدە ىستەپ جاتقانىنا كوپ بولعان جوق. قىزداردىڭ وزدەرى جولعا اتىپ شىققان بولۋى مۇمكىن، مەن بىلمەيمىن. بارلىعىن ءجىتى انىقتاۋ قاجەت"، - دەدى تاكسي قىزمەتىندەگىلەر.
