قاراعاندىدا بۇدان ءبىر عاسىر بۇرىن جاسالعان كونە دومبىرا تابىلدى، دەپ حابارلايدى قامشى اقپاراتتىق اگەنتتىگى 24.kz-كە سىلتەمە جاساپ. 

ءقازىر بۇل قۇندى جادىگەر شەرتپە كۇي ورتالىعىنىڭ جەتەكشىسى قايروللا ءسادۋاقاسوۆتىڭ قولىندا ساقتاۋلى تۇر. قايروللا ءسادۋاقاسوۆقا ۇلتتىق اسپاپتى مويىنتى اۋىلىندا تۇراتىن راحمانالي ابەۋوۆ اقساقال تابىستاپتى. ال قارياعا قارا دومبىرا 1932 جىلى اكەسىنەن مۇرا بولىپ قالعان. سودان بەرى راحمانالي اتا ونى كوزىنىڭ قاراشىعىنداي ساقتاپ كەلگەن.

قازاقتىڭ ۇلتتىق كۇي ونەرىن زەرتتەپ جۇرگەن قايروللا ءسادۋاقاسوۆتىڭ ايتۋىنشا، بۇل كونە دومبىرادا اتاقتى قىزداربەك، ءابدي، سەمبەك سىندى سۇڭعىلا كۇيشىلەردىڭ ويناۋى ابدەن مۇمكىن. سەبەبى ولاردىڭ بارلىعى وسى شەت وڭىرىندە ءومىر سۇرگەن. دومبىرا دا سول ۋاقىتتاردا جاسالعان ەكەن.

قايروللا ءسادۋاقاسوۆ، «كۇي كەرۋەن» شەرتپە كۇي ورتالىعىنىڭ جەتەكشىسى: - كەشەگى سەمبەك، ءابدي، قىزداربەكتەردىڭ قولى تيگەن دومبىرا. 1900 جىلى جاسالعان دومبىرا عوي. وسى دومبىرانى رەتتەپ، جوندەپ، ساحناعا الىپ شىقسام دەپ وتىرمىن. ەلباسىمىزدىڭ «بولاشاققا باعدار: رۋحاني جاڭعىرۋ» اتتى باعدارلاماسى شىقتى. بۇل بىزگە وتە كەرەمەت قولداۋ بولىپ وتىر. رۋحاني جاڭعىرۋ – كەشەگى بابالارىمىزدىڭ ءوشىپ قالعان دۇنيەلەرىن قايتا شىعارۋ.

شولۋشى: ايگەرىم تاۋباي