2017 جىلدىڭ 15 مامىرىندا كيشينيەۆ قالاسىندا قازاقستاننىڭ ۋكرايناداعى ەلشىسى جانە مولدوۆا رەسپۋبليكاسىنداعى ەلشىسى مىندەتىن قوسا اتقارۋشى سامات وردابايەۆ مولدوۆانىڭ پرەمەر-مينيسترى پاۆەل فيليپپەن كەزدەسۋ وتكىزدى، دەپ حابارلايدى قامشى اقپاراتتىق اگەنتتىگى ق ر ءسىم باسپا ءسوز قىزمەتىنە سىلتەمە جاساپ.

كەزدەسۋ بارىسىندا ەكى مەملەكەتتىڭ ەكونوميكالىق ءوزارا ءىس-قيمىل ماسەلەلەرى تالقىلاندى. تاعام ونەركاسىبى، شيكىزاتتى وڭدەۋ، وسىمدىكتەردى ءوسىرۋ تەحنولوگياسى مەن سەلەكسياسى، تۋريزم جانە ءبىلىم الۋ سالاسىنداعى ىنتىماقتاستىقتى كەڭەيتۋ قاجەتتىلىگى اتاپ ءوتىلدى. «جاڭا جىبەك جولى» جوباسىنىڭ شەڭبەرىندە ەۋروازياتتىق ترانسپورت دالىزدەرىن قۇرۋ ماڭىزدىلىعى ايتىلدى.

تاراپتار ەۋرازيالىق ەكونوميكالىق وداق، ورتالىق ازيا، جۇڭگو، يران مەن پارسى شىعاناعى ەلدەرى نارىقتارىنا شىعارۋعا جول اشاتىن قازاقستاندا بىرىككەن كاسىپورىنداردى اشۋ پەرسپەكتيۆتىلىگىن باسا ايتتى .

ەلشى  «قازاقستاننىڭ ءۇشىنشى جاڭعىرۋى: جاھاندىق باسەكەگە قابىلەتتىلىك» قازاقستان پرەزيدەنتى نۇرسۇلتان نازاربايەۆتىڭ جىل سايىنعى جولداۋىندا بەلگىلەنگەن ەلىمىزدىڭ دامۋ باسىمدىقتارى، كونستيتۋسيالىق رەفورمالاردىڭ قورىتىندىلارى مەن مەملەكەت باسشىسىنىڭ «بولاشاققا باعدار: رۋحاني جاڭعىرۋ» باعدارلامالىق ماقالاسىمەن تانىستىردى.

ال پ. فيليپ پرەزيدەنت ن. نازاربايەۆتىڭ مەملەكەتتى قۇرۋ مەن قالىپتاسۋىنداعى نەگىزگى ءرولىن، قازاقستاننىڭ الەمدىك ارەناداعى بەلسەندى ءارى جاۋاپتى ساياساتىن ەرەكشە اتاپ ءوتتى. مولدوۆالىق تاراپتىڭ قازاقستانمەن دوستىق پەن ىنتىماقتاستىقتى كۇشەيتۋ باعىتىن راستادى.

سۇحباتتاسۋشىلار الداعى ۋاقىتتا وتكىزىلەتىن ساۋدا-ەكونوميكالىق ىنتىماقتاستىق بويىنشا قازاقستاندىق-مولداۆالىق ۇكىمەتارالىق كوميسسيانىڭ ۇيىمداستىرۋ سۇراقتارىن تالقىلادى.