الماتى وبلىسىندا ءتورت بالانىڭ اكەسى، 40 جاستاعى باقتىباي يبراگيموۆ 7 ايدان بەرى تابىلماي جاتىر. اسىراۋشىسىنان قول ءۇزىپ قالعان جارى مەرۋەرت سەپبوسىنوۆا ءقازىر شاراسىز كۇيدە، دەپ حابارلايدى قامشى اقپاراتتىق اگەنتتىگى قازاقپاراتقا سىلتەمە جاساپ.

سەگىز، جەتى، التى جاستاعى جانە 10 ايلىق بالاسىمەن قالعان ايەل ءقازىر كۇيەۋىنىڭ امان-ەسەن ورالاتىنىنان كۇدەر ۇزگەنىن دە جاسىرمايدى.

«ەشكىمنىڭ جانىنا ەمەس، ءوز جانىما عانا باتىپ تۇر. كۇيەۋىم جوعالعاننان كەيىن بىردەن جۇمىسقا شىقتىم. ءبىراق  27 مىڭ تەڭگەلىك تابىسىم، بالالاردىڭ تاماعىنا دا جوندەپ جەتپەيدى. ەندى عانا تالدىقورعان قالالىق جۇمىسپەن قامتۋ جانە الەۋمەتتىك باعدارلامالار ارقىلى 4 بالاما 3 ايدا ءبىر رەت بەرىلەتىن 9 مىڭ تەڭگە كولەمىندە جاردەماقى الدىم. مەملەكەت 3 ايدا ءبىر رەت بولسىن 9 مىڭ تەڭگەدەن بەرىپ جاتىر. تاۋبە. ءبىراق، ءقازىر ءبارى قىمبات. بالالارىمدى وسىرىپ-جەتكىزۋىم كەرەك. جولداسىمنىڭ نە ءتىرى، نە ءولى ەكەنىن بىلمەي، جۇمباق كۇيدە ءومىر ءسۇرىپ جاتىرمىز. ەسەڭگىرەپ قالدىم»، - دەيدى مەرۋەرت سەپبوسىنوۆا.

ءقازىر مەرۋەرت باسپانا جالداپ، تالدىقورعان قالاسىنا قاراستى اششىبۇلاق ساياجايىندا تۇرىپ جاتىر ەكەن. بالالارىنا قىستى كۇنى اياق-كيىم دە الىپ بەرە المادىم دەگەن جالعىز باستى انا جانى جومارت جاندار قول ۇشىن سوزسا دەيدى. 

«بالا-شاعاما كومەك بەرسە دەپ تىلەيمىن. ءتورت بالامنىڭ بولاشاعىنا قاتتى الاڭدايمىن. باسپانامدى ىڭعايلاپ السام دەگەن ارمانىم بار. ەگەر نيەتتى جاندار بولسا، 8775 175 28 86 نومىرىنە حابارلاسۋلارىن سۇرايمىن. قازاق جەتىمىن جىلاتپاعان حالىق قوي، جانى جومارت جانداردان ءۇمىتىمدى ۇزبەيمىن» -دەيدى تالدىقورعاندىق تۇرعىن.

ەستەرىڭىزگە سالا كەتەيىك، باقتىباي كولباي ۇلى  يبراگيموۆتىڭ جوعالعاندىعى جونىندە ءبىز بۇعان دەيىن دە حابارلاعان بولاتىنبىز.  40 جاستاعى باقتىباي كولباي ۇلى  مەن  1961 جىلى تۋعان ايمۇحامەد ومار ۇلى 27 قازان كۇنى ەكەۋى جولعا شىعىپ، حابار-وشارسىز كەتكەن. اقسۋ اۋدانىنان تالدىقورعانعا بارماق بولعان ازاماتتاردىڭ ءبىرى  ايمۇحامەد ومار ۇلىنىڭ  ءولى دەنەسى تالدىقورعان-ماتاي تاس جولى ماڭىنداعى كولشىكتەن تابىلعان. ال ۇشتى-كۇيلى جوعالعان باقتىباي كولبايۇلىنان ءالى حابار جوق. ەگەر كىمدە-كىم وسى ازاماتتى تانىپ،  حاباردار بولسا  اقسۋ اۋدانىنىڭ ءىىب حابارلاسۋىن، جارى مەرۋەرت سەپبوسىنوۆا كوپشىلىكتەن سۇرايدى.