43 جاستاعى الەكساندر شيلين سىرتقى ىستەر مينسترلىگىندە قىزمەت اتقارعان. ول ءوز ۇيىندە تانىسىن، سوسىن ونىڭ كىشكەنتاي قىزىن ولتىرگەن دەپ جازادى قامشى اقپاراتتىق اگەنتتىگى شەتەلدىك باق-قا سىلتەمە جاساي وتىرىپ. ول ايەل مەن ونىڭ قىزىن ولتىرگەننەن  كەيىن ءوز-وزىن ءولتىرىپتى. بۇل وقيعاعا بايلانىستى تەرگەۋ جۇرگىزىلىپ جاتىر. الايدا تابىستى، ينتەلەكتۋالدىق دەڭگەيى جوعارى ادامنىڭ سونداي قىلمىسقا نە ءۇشىن بارعانى بەلگىسىز، جۇمباق بولىپ وتىر.

الەكساندر شيلين الەۋمەتتىك جەلىدەگى بەلسەندى مۇشە ەكەن. الەۋمەتتىك جەلىسىندە ادام سانى كوپ بولعانىمەن، شىنايى ومىردە ەشكىمى جوق دەۋگە دە بولادى.

الەكساندر اڭشىلىقپەن اينالىسا باستاعاننان كەيىن تانىستارى مەن تۋىستارى ارالاسپاي كەتكەن. ول جانۋارلاردى قالاي ولتىرگەنىن سۋرەتكە ءتۇسىرىپ، الەۋمەتتىك جەلىگە سالىپ وتىرىپتى. بۇل سۋرەتتەر بەرگى جاعى بولاتىن. ول اڭداردى قالاي ازاپتاپ ولتىرەتىنىن ءجيى ايتىپ وتىراتىن. سونىمەن بىرگە سودان راحات الادى ەكەن. ونى ازاپتاپ ولتىرگەن كەزدەگى سۋرەتتەردى بارلىق تانىستارىنا جىبەرىپ وتىرىپتى. ول اڭشىلىققا دەگەن قۇمارلىعىن بىرنەشە ساعات بويى ايتىپ وتىرا الادى. ارينە بۇل اڭگىمە بارلىق ادامعا ۇناي بەرمەيتىن ەدى. وسىلاي ول بارلىق دوستارى مەن تانىسىنان ايرىلعان.

باسقا تانىسىنىڭ ايتۋى بويىنشا، ونىڭ وسىنداي سوراقىلىققا بارۋ سەبەبى ونىڭ ازيا ەلىنە ساپارى دەپ بولجاپ وتىر.

«بىزدەگى كوپ ادامدار ازيادا تۇردى. ول جەردەگى ءداستۇر دە، ءومىر دە باسقا. ول جەردە سەكتالار وتە كوپ بولعاندىقتانالەكساندردىڭ  پسيحيكاسىنا اسەر ەتكەن سەكىلدى. ول وزگە ەلدە ەشقانداي تانىستارى مەن دوستارىنسىز باردى. ايەلى دە ماسكەۋدە قالعان»،- دەيدى الەكساندردىڭ قىزمەتتەسى.

ونىڭ ايتۋى بويىنشا، الەكساندر ولتىرگەن ايەل ونىڭ كوڭىلدەسى بولۋى مۇمكىن. ءبىراق بۇل ايەلدى تانىمايتىنىن ايتتى. بۇل وقيعا بويىنشا تەرگەۋ ءالى دە جالعاسۋدا.

اۋدارعان: اسەل وتەشوۆا