ەلباسى نۇرسۇلتان نازاربايەۆ ءوزىنىڭ «بولاشاققا باعدار: رۋحاني جاڭعىرۋ» اتتى ماقالاسىندا قازاق ءتىلىن بىرتىندەپ لاتىن الىپبيىنە كوشىرۋ جايىن ايتقان ەدى. ۇكىمەتكە جاڭا الىپبيگە كوشۋدىڭ ناقتى كەستەسىن جاساۋدى تاپسىرعان.
ءقازىر بۇل باعىتتا ءبىراز شارۋا قولعا الىندى. ارينە، ەسكى تاجىريبەمىز دە ەسكەرىلەدى.
الماتىداعى پرەزيدەنت ءارحيۆى ءوز قورىندا ساقتالعان لاتىن گرافيكاسىنداعى قۇجاتتاردى جاريالادى، دەپ حابارلايدى حابار ارناسى. قۇجات اراب الىپبيىنەن لاتىن گرافيكاسىنا اۋىسقان كەزەڭنەن سىر شەرتەدى. 9 عاسىر بويى قازاقستاندا اراب ءالىپبيى قولدانىلىپ كەلدى. تەك 1929 جىلى 7 تامىزدا «ءبىرتۇتاس تۇركى ءالفاۆيتىن» ەنگۋزى تۋرالى قاۋلى قابىلدانادى. ال 12 جىلدان كەيىن قازاق جازۋىن كيريلليساعا اۋىستىرۋ تۋرالى زاڭ شىقتى.
«بۇل جەردە قۇجاتتارمەن قاتار سول ۋاقىتتا قازاقستان باسپالارىنان شىققان لاتىن الىپپەسىندەگى كىتاپتار بار. كورنەكتى جازۋشىمىز مۇحتار اۋەزوۆتىڭ ايتباي حانگەلديننىڭ «دۋداراي» وپەراسىنا جازعان ليبرەتتوسىنا بەرگەن پىكىرى، سىنى وسىندا كەلتىرىلگەن. ول دا لاتىن الىپپەسىمەن جازىلعان بولاتىن»، – دەدى ق ر پرەزيدەنتى ءارحيۆىنىڭ ديرەكتورى بوريس جاپاروۆ.
ەلباسى ماقالاسىندا لاتىنشاعا كوشۋدىڭ تەرەڭ ءمانى بار ەكەنىن جەتكىزدى.
«بۇل جاڭا تەحنولوگيالىق ورتانىڭ، عىلىم مەن ءبىلىم بەرۋ پروسەسىنىڭ ەرەكشەلىكتەرىنە بايلانىستى».
مەملەكەت 2025 جىلدان باستاپ لاتىن الىپبيىنە كوشۋدى جوسپارلاپ وتىر. وسى جىلدىڭ سوڭىنا دەيىن قازاق ءالىپبيىنىڭ جاڭا گرافيكاداعى ءبىرىڭعاي نۇسقاسى قابىلدانۋى ءتيىس. ال 2018 جىلدان باستاپ جاڭا ءالىپبيدى ۇيرەتەتىن ماماندار مەن ورتا مەكتەپتەرگە ارنالعان وقۋلىقتاردى دايىنداۋ قولعا الىنادى.
شولۋشى: گۇلىم جاقان
