ەلىمىزدە ەت باعاسى قىمباتتاپ، بازاردا ءبىر كەلىسى جەتى دوللاردان، ياعني 2300 تەڭگەدەن ساتىلۋى مۇمكىن. قىتايعا ەت ەكسپورتى باستالسا، باعا وسەدى دەگەن اقپاراتتى بۇگىن اۋىل شارۋاشىلىعى مينيسترلىگى دە راستادى.
ال ۇكىمەت ەڭ ءوتىمدى سيىر ەتىن ەلىمىزدىڭ 9 وبلىسىنان قىتايعا جىبەرۋگە ساقاداي ساي وتىر.
جىلىنا رەسەيگە 60 مىڭ توننا ەت ەكسپورتتاماق بولعان ەلىمىز، ەندى قىتايعا بەت بۇرىپ، ولارعا 50 مىڭ توننا ساتۋدى جوسپارلاپ جاتىر، دەپ حابارلايدى قامشى اقپاراتتىق اگەنتتىگى zakon.kz-كە سىلتەمە بەرىپ.
ەتتى ەكسپورتتاۋدى ۇزاق جىلدار جوسپارلاعان ۇكىمەتتىڭ ءۇمىتى جاقىن كۇندەرى اقتالاتىن سياقتى. بۇگىن پرەمەردىڭ الدىندا بايانداما جاساعان اۋىل شارۋاشىلىق ۆيسە-مينيسترى قايرات ايتۋعانوۆ توڭازىتىلعان سيىر ەتىن قىتايعا جىبەرۋگە كەدەرگىلەردىڭ جويىلعانىن جەتكىزدى.
ياعني، ەلىمىزدىڭ 9 وبلىسىنان مال شارۋاشىلىعى ونىمدەرىنە اۋسىلعا قاتىستى شەكتەۋ الىنىپ، 5 وڭىردە ۆاكسيناسيالاۋ جۇرگىزىلۋدە. ەندى ەكى ەل اراسىنداعى كەلىسىم اياقتالسا، جىلىنا ەلىمىزدەن 50 مىڭ توننا سيىر ەتى قىتايعا جونەلتىلە باستايدى...
وسى اقپاراتتى اۋىل شارۋاشىلىعى ۆيسە-مينيسترىنىڭ ءوزى راستادى. "جەتى دوللار دەگەن اقپاراتتى مەن دە ەستىدىم. ول ىشكى نارىقتاعى، بولشەك ساۋداداعى باعا بولۋى مۇمكىن. ونداي كوتەرىڭكى باعا بولسا، تاۋار وندىرۋشىلەر قۋانادى"-دەيدى ق ر اۋىل شارۋاشىلىعى ۆيسە-مينيسترى تولەۋتاي راقىمبەكوۆ.
باعانىڭ قىمباتتايتىنىنا شارۋا قوجالىقتارى قۋانعانىمەن، ساتۋشىلار قۋانىپ تۇرعان جوق. ءقازىردىڭ وزىندە بازاردا قىمباتشىلىق، مالدىڭ قۇنى اسپانداپ تۇر. ال، ەكسپورتقا شىعارساق ىشكى نارىقتا جەتىسپەۋشىلىك بولىپ، ەت شارىقتاپ كەتەدى دەپ قاۋىپتەنەدى...
ال، قىتايعا ەت قانداي باعامەن ەكسپورتتالاتىنى دا ازىرگە بەلگىسىز. شەنەۋنىكتەر ءونىمنىڭ قۇنى ەكى جاقتىڭ كەلىسىمىنە بايلانىستى بولماق دەپ وتىر. جانە ەتتى تەكسەرەتىن زەرتحانا، جەتكىزەتىن كولىك شىعىنى مەن قوسالقى سالىعى دا ەسەپكە الىنۋى ءتيىس.
شولۋشى: نازەركە مۇسا
