الماتى قالاسىنىڭ قىلمىستىق ىستەر جونىندەگى مامانداندىرىلعان اۋدانارالىق سوتىندا بانكير مۇحتار ءابىلازوۆ پەن ونىڭ سىبايلاستارىنا قاتىستى قىلمىستىق ءىستى قاراۋ ودان ءارى جالعاسۋدا. سوتتىڭ بۇگىنگى وتىرىسىندا «Klostrade Financial Group LTD» وففشورلىق كومپانياسى ارقىلى بتا بانكتىڭ 4،8 ميلليارد تەڭگەسىن جىمقىرۋعا قاتىستى وقيعا قارالدى. بۇل كومپانيا دا سەيشەل ارالدارىندا تىركەلگەن.

«ءبىر كۇندىك» كومپانيانىڭ ديرەكتورى رەتىندە الدەبىر دجەفري تەيلور دەگەن ادام كورسەتىلگەن. ايتا كەتەرلىك جايت، وففشورلىق كومپانيالاردىڭ جالعان جەتەكشىلەرى ەشقاشان قازاقستانعا كەلمەگەنى بەسەنەدەن بەلگىلى. ولاي بولسا، بتا بانكتىڭ قىزمەتكەرلەرى دە ولاردى ەشقاشان كورمەگەنى ايدان انىق.

«Klostrade Financial Group LTD» كومپانياسىنا نەسيە بەرۋگە قاجەتتى قۇجاتتاردى №6 كورپوراتيۆتىك بيزنەس باسقارماسىنىڭ قىزمەتكەرلەرى دايىنداعان. بۇعان دەيىنگى سوت وتىرىستارىندا اتالعان قۇرىلىمنىڭ تىكەلەي مۇحتار ءابىلازوۆتىڭ باقىلاۋىندا بولعانى بىرنەشە مارتە ايتىلعان  ەدى.

№6 كورپوراتيۆتىك بيزنەس باسقارماسىنىڭ نەگىزگى مىندەتتەرىنىڭ ءبىرى - بتا بانكتەن ەش كەدەرگىسىز نەسيە اقشا الۋ ءۇشىن مۇحتار ءابليازوۆتىڭ نۇسقاۋىمەن وففشورلىق ايماقتاردا «ءبىر كۇندىك» كومپانيالاردى تىركەۋ بولىپ تابىلعان.

سوت وتىرىسىندا بۇعان دەيىن تۇسىنىك بەرگەن كۋاگەرلەردىڭ ايتۋىنا قاراعاندا، كوممەرسيالىق قىزمەتپەن اينالىسقانىن اسىرىپ كورسەتۋ ءۇشىن نەگىزگى كومپانياعا باعىنىشتى ەنشىلەس كومپانيالار ءارتۇرلى تاۋارلاردى ساتىپ الۋ ماقساتىندا مۇحتار ءابليازوۆتىڭ باقىلاۋىنداعى باسقا «ءبىر كۇندىك» كومپانيالارمەن كەلىسىم-شارت جاساعان. تۇپتەپ كەلگەندە، ەشقانداي كومپانيا تاۋار ساتىپ الماعانى انىق. ال جالعان كەلىسىمدەر تەك بانكتەن نەسيەلىك قاراجاتتاردى الۋعا عانا قاجەت بولعان.

«2008 جىلى «Klostrade Financial Group LTD» كومپانياسى بتا بانكتەن نەسيە اقشا الۋعا بىرنەشە رەت ءوتىنىش بەرگەن. نەسيە اقشانىڭ ماقساتى رەتىندە جاسالعان كەلىسىم-شارتتار بويىنشا مىندەتتەمەلەردى ورىنداۋعا جۇمسالاتىنى كورسەتىلەدى»، - دەپ حابارلادى سوت وتىرىسىندا مەملەكەتتىك ايىپتاۋشى ەركىن بايماعامبەتوۆ.

اتاپ ايتارلىعى، كەلىسىم-شارتتىڭ مانىنە كەلگەندە ەشكىم باسىن قاتىرماعان كورىنەدى. ويتكەنى، تاۋاردى م. ءابليازوۆقا باعىنىشتى باسقا ءبىر كومپانيا تاسىمالدايدى. مىسالى، بۇل جولى سويا بۇرشاعى مەن باسقا دا تەز بۇزىلاتىن ازىق-تۇلىك ونىمدەرىن  «Noble Resources»، «Bunge SA» كومپانيالارى جەتكىزۋى ءتيىس بولعان. ءبىراق تۇپتەپ كەلگەندە، تاۋار دا، ونى ساتىپ الۋعا بتا بانكتەن بولىنگەن نەسيە اقشا دا قازاقستانعا جەتپەگەن.  

«بۇل جولى دا بانكىشىلىك نورماتيۆتىك قۇجاتتارعا قويىلاتىن تالاپتار بۇزىلعان. كەپىلزاتتىق مىندەتتەمە قامتاماسىز ەتىلمەيدى. الايدا سوعان قاراماستان، بتا بانكتىڭ نەسيە كوميتەتى اتالعان اككرەديتيۆتى اشۋ تۋرالى زاڭسىز شەشىم شىعارادى» - دەپ جالعادى ءسوزىن مەملەكەتتىك ايىپتاۋشى.

جالپى العاندا بۇل قىلمىستىق كەستە ارقىلى مۇحتار ءابليازوۆ پەن ونىڭ سىبايلاستارى 4،8  ميلليارد تەڭگەنى جىمقىرعان.

ايتا كەتەلىك، قاشقىن بانكير مۇحتار ءابىلازوۆتىڭ قىلمىستىق ءىسى بويىنشا باستى سوت وتىرىسى اعىمداعى جىلدىڭ 3ء-ىنشى ساۋىرىندە باستالدى. سوت وتىرىستارىنا ءۇش مەملەكەتتىك ايىپتاۋشى، سوتتالۋشىلاردىڭ قورعاۋشىلارى جانە بتا بانكىنىڭ وكىلى قاتىسۋدا. قىلمىستىق ءىستىڭ جالپى كولەمى 2 224 تومنان تۇرادى. ايىپتاۋشىلار تىزىمىندە 200-دەن استام كۋاگەرلەر بار. مۇحتار ءابىلازوۆتىڭ ءوزى العاشقى سوت وتىرىسىنان باستاپ سوتقا كەلگەن جوق. ونىڭ مۇددەسىن سوتتا مەملەكەت بەلگىلەگەن قورعاۋشى انجەليكا ءاجىعۇلوۆا قورعاۋدا.