پارلامەنت سەناتى بۇگىن پلەنارلىق وتىرىسىندا "ەۋرازيا ەكونوميكالىق وداعى تۋرالى كەلىسىمدى راتيفيكاسيالاۋ تۋرالى" زاڭ جوباسىن ماقۇلدادى. بۇل تۋرالى «ازاتتىق راديوسى» حابارلادى.

ەاەو (ەۋرازيا ەكونوميكالىق وداعى) رەسەي، قازاقستان، بەلارۋس مۇشە بولىپ وتىرعان كەدەن وداعى نەگىزىندە قۇرىلۋ كوزدەلگەن ەكونوميكالىق وداق. وداق قۇرۋ كەلىسىمىنە ءۇش ەلدىڭ باسشىلارى بيىل 29 مامىر كۇنى استانادا قول قويعان. ەاەو قىزمەتىنە 2015 جىلى 1 قاڭتار كۇنى كىرىسۋ جوسپارلانعان.  ەاەو-دا مىناداي ورگاندار – جوعارعى ەۋرازيالىق ەكونوميكالىق كەڭەس، ەۋرازيالىق ۇكىمەتارالىق كەڭەس، ەۋرازيالىق ەكونوميكالىق كوميسسيا جانە ەاەو سوتى جۇمىس ىستەيدى.

رەسەي مەملەكەتتىك دۋماسى ەۋرازيا ەكونوميكالىق وداعى كەلىسىمشارتىن 26 قىركۇيەك كۇنى راتيفيكاسيالاعان. بەلارۋس پارلامەنتى كەلىسىمدى راتيفيكاسيالاۋ ماسەلەسىن بۇگىن قارايدى.

ق ر پارلامەنت پالاتالارى ماقۇلداعان زاڭ جوباسى ەندى پرەزيدەنتتىڭ قول قويۋىنا جىبەرىلدى.

قامشى-اقپارات